महाधिवेशनका लागि एनआरएनएले तोक्यो मनोनयन शुल्क, कुन पदमा कति ?

काठमाडौँ । गैरआवासीय नेपाली संघ (एनआरएनए) ले आगामी महाधिवेशनका लागि उम्मेदवारी मनोनयनको शुल्क तोकेको छ । मे ३ देखि ५ सम्म एनआरएनएले एकता महाधिवेशनको घोषणा गरेको छ ।

सर्वोच्च अदालतद्वारा गठित उच्चस्तरीय समितिको १३ औँ बैठकले उम्मेदवार बन्नका लागि मनोनयन शुल्क निर्धारण गरेको हो ।

समितिको बैठकले अध्यक्षको उम्मेदवारका लागि ७ लाख रुपैयाँ, उपाध्यक्षका लागि ५ लाख, महासचिवका लागि ४ लाख, सचिव र कोषाध्यक्षका लागि ३ लाख, सहकोषाध्यक्षदेखि संयोजकका लागि २ लाख र उपसंयोजकदेखि आइसिसी सदस्यका लागि १ लाख रुपैयाँ मनोनयन शुल्क तोकेको समितिकी सदस्यसचिव जानकी गुरुङले जानकारी दिइन् ।

संघले विज्ञप्ति जारी गर्दै यसअघि नै ३ सदस्यीय निर्वाचन समिति गठन गरिसकेको बताएको छ । समितिले सदस्यता वितरणको समय १ साता थप गरेर अप्रिल ७ सम्म पुर्‍याएको छ ।

प्रतिनिधि बन्नका लागि अप्रिल १ देखि २२ सम्म निवेदन दिन सकिनेछ । काठमाडौँमा प्रतिनिधि बन्न भने १०० डलर वा सो बराबरको नेपाली रकम बुझाउनुपर्ने समितिले जनाएको छ ।