बेनीमा चक्रपथ स्तरोन्नति सुरु

म्याग्दी । जिल्ला सदरमुकाम बेनी बजारमा चक्रपथ स्तरोन्नति योजना सुरु भएको छ । बेनी नगरपालिका–८ कालीपुलदेखि वडा–७ मा रहेको दरवाङ बसपार्क जोड्ने कालीगण्डकी र म्याग्दी नदी किनारको सडक स्तरोन्नति गर्न थालिएको हो ।
सघन सहरी तथा भवन निर्माण आयोजना कार्यालय बागलुङसँग ३ करोड १९ लाखमा ठेक्का सम्झौता गरेको विकेश–दुप्चेश्वर–शुभम जेभीले पहिलो चरणमा नाली निर्माणको काम थालेको छ । योजनामार्फत् ९०० मिटर सडकको कुनातर्फ टेवा पर्खाल, नाली, डिलमा रेलिङ निर्माण गरी ५ देखि ६ मिटर चौडाइका दरले ढलान गरिने आयोजना कार्यालयका इन्जिनियर वीरबल सुनारले जानकारी दिए ।
बेनी बजारलाई कालीगण्डकी र म्याग्दी नदीको कटान नियन्त्रणका लागि निर्माण भएको पक्की पर्खाल पछाडिको भागमा माटो फिलिङ गरेर बनाइएको सडक स्तरोन्नति गर्न लागिएको हो ।
संघीय सरकारले अगाडि बढाएका १० वटा नमुना नगरपालिका कार्यक्रमअन्तर्गत नगरपालिकाले बेनी चक्रपथ स्तरोन्नति योजनाका लागि बजेट विनियोजन भएर काम अघि बढेको मेयर सुरत केसीले बताए ।
‘चक्रपथ स्तरोन्नति भएपछि ठुला सवारीसाधनलाई चक्रपथबाट आवतजावत गर्न सहज हुनेछ,’ उनले भने, ‘हाल चक्रपथबाट उडेको धुलो बजारमा आएर प्रदूषण हुने समस्या पनि स्तरोन्नति भएपछि समाधान हुनेछ ।’
बेनी बजार क्षेत्रका सडकमा सवारी चाप घटाउन मालबाहक र बजारभित्र रोक्नुनपर्ने सवारीसाधनलाई चक्रपथबाट सञ्चालनको व्यवस्था मिलाइएको छ ।
चक्रपथ स्तरोन्नति भएपछि सडक छेउमा फूल रोप्ने र विद्युतीकरण गरेर सौन्दर्यीकरण गर्ने योजना रहेको बेनी–८ का वडाध्यक्ष उत्तमकुमार कर्माचार्यले बताए ।
३ बर्से योजनाअन्तर्गत आर्थिक वर्ष २०८२/८३ का लागि दरवाङ बसपार्क ढलान र २०८३/८४ मा उक्त बसपार्कमा टर्मिनल भवन निर्माण गर्न सहरी विकास मन्त्रालयलाई प्रस्ताव गरिएको छ । पर्याप्त मजदुर र उपकरण परिचालन गरेर निर्धारित समयभित्रै योजना सम्पन्न गरिने निर्माण कम्पनीका प्रतिनिधि सुवासचन्द्र कार्कीले बताए ।