नेपाल इन्भेष्टमेन्ट मेघा बैंकको नाफा साढे ४ अर्ब नाघ्यो

काठमाडौँ । नेपाल इन्भेष्टमेन्ट मेघा बैंक लिमिटेडले चालु आर्थिक वर्षको तेस्रो त्रैमाससम्ममा ४ अर्ब ५४ करोड रुपैयाँ खुद नाफा कमाएको छ। यो गत आर्थिक वर्षको सोही अवधिको तुलनामा ३८.६१ प्रतिशत बढी हो। गत आर्थिक वर्षको सोही अवधिसम्ममा बैंकले ३ अर्ब २७ करोड रुपैयाँ खुद नाफा कमाएको थियो।

इम्पेरमेन्ट चार्ज घटेका कारण बैंकको खुद नाफा बढ्न पुगेको हो। समीक्षा अवधिमा बैंकको खुद ब्याज आम्दानी ६.५० प्रतिशत घटेर १० अर्ब ३१ करोड ३९ लाख रुपैयाँमा सिमित भएको छ भने खुद फि तथा कमिशन आम्दानी ३३.२४ प्रतिशतले बढेर १ अर्ब ५२ करोड ११ लाख रुपैयाँ पुगेको छ।

त्यस्तै, बैंकको कुल सञ्चालन आम्दानी १.६५ प्रतिशतले घटेर १२ अर्ब ७९ करोड ५३ लाख रुपैयाँमा सिमित भएको छ भने सञ्चालन मुनाफा २२.२६ प्रतिशतले बढेर ६ अर्ब ६१ करोड १४ लाख रुपैयाँ पुगेको छ। समीक्षा अवधिमा बैंकको इम्पेरमेन्ट चार्ज ३ अर्ब ४ करोडबाट घटेर १ अर्ब १९ करोडमा सीमित भएको छ। जसका कारण बैंकको खुद नाफा बढ्न पुगेको हो।

बैंकको प्रतिशेयर आम्दानी ४ रुपैयाँ ९४ पैसा बढेर १७ रुपैयाँ ७४ पैसा पुगेको छ। चैत मसान्तसम्ममा बैंकको वितरणयोग्य आम्दानी १ अर्ब १० करोड रुपैयाँ ऋणात्मक रहेको छ। सो अवधिसम्ममा बैंकको मूल्य आम्दानी अनुपात ११.९२ गुणा रहेको छ भने प्रतिशेयर नेटवर्थ १९० रुपैयाँ पैसा रहेको छ।

बैंकको तेस्रो त्रैमासको अन्त्यसम्ममा ४ खर्ब ५५ अर्ब ८९ करोड ९ लाख रुपैयाँ निक्षेप संकलन गरी ३ खर्ब २७ अर्ब ८२ करोड ३४ लाख रुपैयाँ कर्जा लगानी गरेको छ। चुक्ता पूँजी ३४ अर्ब १२ करोड ८५ लाख रुपैयाँ रहेको बैंकको जगेडा कोषमा ३० अर्ब ८४ करोड ९४ लाख रुपैयाँ सञ्चित छ।