सुनको भाउ प्रतितोला १ लाख रुपैयाँ नजिक, चाँदीको पनि बढ्दै

पहेँलो धातु सुनको मूल्य लगातार बढेर एक लाख रुपैयाँ नजिक पुगेको छ। महिलाहरुको महान चाड तिज नजिकिँदै गर्दा स्थानीय बजारमा सुनको मूल्य एक लाख रुपैयाँ नजिक पुगेको हो ।

नेपालमा अन्तर्राष्ट्रिय बजारमा निर्धारण हुने सुनको भाउ अनुसार मूल्य निर्धारण हुने गरेको छ। अन्तर्राष्ट्रिय बजारमा नै सुनमा लगानीकर्ता आकर्षित बन्दा त्यसको प्रत्यक्ष असर स्थानीय बजारमा पर्न गएको हो ।

साउन ८ गते बिहीबार सुनको भाउ तोलामा ५०० रुपैयाँले बढेर र्कीतिमानी उचाइमा पुगेको छ। नेपाल सुनचाँदी व्यवसायी महासंघले बिहीबारका लागि छापावाला सुनको भाउ प्रतितोला ९४ हजार ५०० रुपैयाँ र तेजाबी सुनको भाउ प्रतितोला ९४ हजार ६५ रुपैयाँ तोकेको छ।

पछिल्लो समय सुनको मूल्यले प्रत्येक दिन नयाँ रेकर्ड कायम गर्दै आएको छ । लकडाउनअघि प्रतितोला ७७ हजार रुपैया रहेको सुनको मूल्य बिहीबार ९४ हजार ५०० रुपैयाँ पुगेको हो।

अन्तर्राष्ट्रिय बजारमा सुनको मूल्य लगातार बढ्दै गएकाले एक लाख रुपैयाँसम्म पुग्ने व्यवसायीको अनुमान छ ।

सरकारले सुनमा गरेको भन्सार वृद्धि र अन्तर्राष्ट्रिय बजारमा शेयर मूल्यसमेत घट्दै गएकाले सुनमा लगानी बढ्दै गएको छ । सरकारले बजेटमार्फत प्रति दशग्राम सुनमा २ हजार रुपैयाँ भन्सार बढाएको थियो ।

गत वर्ष यस अवधिमा दैनिक ३० देखि ४० किलो सुनको खपत हुने गरेकोमा अहिले मुश्किलले दैनिक ५ देखि १० किलो खपत हुने गरेको व्यवसायीको भनाइ छ । ग्राहकको क्रयशक्तिभन्दा पनि सुनको मूल्य उच्च भएपछि बजारमा सुनको कारोबार नै ठप्प छ ।

यस्तै चाँदीको भाउ पनि बिहीबार १० रुपैयाँले बढेर १ हजार १४५ रुपैयाँ पुगेको छ। बुधबार चाँदी प्रतितोला १ हजार १३५ रुपैयाँमा कारोबार भएको थियो। चाँदीको भाउ बुधबार ९५ रुपैयाँले बढेको थियो।

बुधबार तोलामा १ हजार ३०० रुपैयाँले बढेर छापावाला सुन प्रतितोला ९४ हजार रुपैयाँ, र तेजावी सुन ९३ हजार ५६० रुपैयाँमा खरिद बिक्री भएको थियो।

मासिक ५ अर्ब रुपैयाँ बराबरको सुनचाँदी व्यवसायीको कारोबार हुने गरेकोमा कोरोना भाइरसको कारणले सुनचाँदी व्यवसायमा झन्डै १५ अर्बको नोक्सान भएको महासंघले जनाएको छ ।