पुस लागेपछि बैंकहरुमा ६२ अर्ब निक्षेप थपिँदा ६१ अर्ब कर्जा विस्तार

कोभिडका कारण थला परेको मुलकको अर्थतन्त्र पछिल्ला केहि महिना यता क्रमश चलायमान हुन थालेपछि बैंकहरुमा कर्जाको माग निरन्तर बढ्न थालेको छ ।

तिहार सकिए लगत्तै आक्रमक रुपमा कर्जा विस्तार गर्दै आएका बैंकहरुले चालु आर्थिक वर्षको पुस महिनाको १७ दिनमा मात्रै ६१ अर्ब कर्जा विस्तार गरेका छन् । यस अवधिमा बैंकहरुले ६२ अर्ब निक्षेप संकलन गरेका छन् ।

मंसिर महिना सुरु भएयता बैंकहरुमा कर्जाको माग ह्वात्तै बढेको छ भने बैंकहरुले समेत कर्जा विस्तारलाई जोड दिएका छन । संचालनमा रहेका २७ वाणिज्य बैंकले गएको साता मात्रै २७ अर्ब निक्षेप उठाएर २२ अर्ब कर्जा विस्तार गरेका छन् । पछिल्लो एक महिनामा बैंकरुले ७१ अर्ब रुपैयाँ निक्षेप संकलन गर्दा ७८ अर्ब कर्जा विस्तार गरेका छन् । पछिल्लो एक महिनाको तथ्यांक हेर्दा बैंकहरुले निक्षेप संकलन भन्दा ७ अर्ब रुपैयाँ बढी कर्जा प्रवाह गरेका छन् ।

नेपाल बैंकर्स संघका अनुसार पुस १७ गतेसम्म वाणिज्य बैंकहरुले ३७ खर्ब ५६ अर्ब रुपैयाँ निक्षेप संकलन गरेका छन् । यसअवधिमा बैंकहरुले ३१ खर्ब ६१ अर्ब कर्जा विस्तार गरेका छन् ।

चालु आर्थिक वर्ष सुरु भएयता वाणिज्य बैंकहरुमा २ खर्ब ६९ अर्ब निक्षेप थपिएको छ भने यस अवधिमा बैंकहरुले २ खर्ब ५९ अर्ब कर्जा प्रवाह गरेका छन । गत असारको अन्तसम्म बैंकहरुमा ३४ खर्ब ८७ अर्ब निक्षेप रहेको थियो । सो अवधिसम्म बैंकहरुले २९ खर्ब ३ अर्ब कर्जा प्रवाह गरेका थिए ।

यतिबेला बैंक तथा वित्तीय संस्थामा प्रशस्त तरलता रहेको र ब्याजदर समेत सस्तो भएपछि नयाँ व्यवसाय गर्नेहरुले लगानीका लागि उपयुक्त अवसरको रुपमा लिएकाले पनि बैंकहरुमा कर्जाको माग बढेको देखिन्छ । साथै राष्ट्र बैंकले कोभिड प्रभावितका लागि ल्याएका सहुलियत कार्यक्रमहरुले पनि बैंकहरुको कर्जा बढेको हो । केहिदिन अघि मात्र अर्थमन्त्रालयले सहुलियतको कर्जा पहुँच विस्तार गर्न सरोकारवालाहरुलाई निर्देशन समेत दिएको थियो ।

कोरोना भाइरसको प्रभाव कम हुँदै गएपछि बैंकहरुमा कर्जाको माग आउन थालेको हो । पछिल्लो समय अर्थतन्त्र चलायमान बन्दै गएको छ । जनजिवन तथा व्यापार व्यवसाय पहिलेकै अवस्थामा फर्कर्ने चरणमा रहेकाले आर्थिक गतिविधि समेत बढेपछि बैंकहरुले कर्जा विस्तार गर्न थालेका छन ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।