‘पार्किङ्ग मनि’ बाहिरिन थालेपछि दुई हजार ५०० बिन्दुभन्दा तल झर्यो नेप्से

लगानीका अन्य क्षेत्र संकुचित हुँदा शेयर बजारमा भित्रिएको पार्किङ्ग मनि बाहिरिन थालेसँगै शेयर बजार परिसूचक नेप्सेमा ठूलो गिरावट देखिन थालेको छ । यससँगै शेयर बजार परिसूचक नेप्सेले वियरिस ट्रण्ड समात्दा साताको पहिलो कारोबार दिन नेप्से २ हजार ५०० बिन्दुभन्दा तल झरेको छ ।

आइतबार बजार खुलको १ घण्टा नबित्दै ५४ अंकले नेप्से घट्दा सूचक २ हजार ५०० बिन्दुभन्दा तल झरेको हो । बिहीबार ४४ अंकले घटेको नेप्से सूचक आइतबार सो भन्दा उच्च अंकले गहिरिएको छ । बिहीबारअघि गत बुधबार नेप्से १३ अंकले बढेपनि सो भन्दा अघिल्ला दुई दिन मंगलबार र बुधबार पनि नेप्से क्रमशः साढे ३२ र २१ अंकले घटेको थियो ।

बैंक तथा वित्तीय संस्थाहरुमा कर्जा माग भई अधिक तरलता रकम घट्दा त्यसको सोझो प्रभाव शेयर बजारमा परेको हो । बैंकिङ्ग प्रणालीमा दुई महिनाअघि २ खर्बमाथि अधिक रहेको तरलता पछिल्लो समय ६० अर्ब भन्दा तल झरेको छ । तरलता घट्दै जाँदा अब ब्याजदर पनि बढ्ने संकेत देखिएको छ । केही बैंकले मुद्दती निक्षेपको ब्याजदर वृद्धि गरेको सूचना समेत सार्वजनिक गरिसकेका छन् । केन्द्रीय बैंकले चालु आर्थिक वर्षमा करिब १ राष्ट्र ऋण उठाएको छ ।

बैंक तथा वित्तीय संस्थाहरुमा ७ महिनामा ३ खर्ब १२ अर्ब निक्षेप बढ्दा ४ खर्ब ३२ अर्ब रुपैयाँले कर्जा विस्तार भएको तथ्याङ्क छ । निक्षेप संकलन भन्दा कर्जा विस्तार बढी हुन थालेपछि शेयर बजारमा करेक्शन सुरु भएको हो ।

अर्कोतर्फ धेरैजसो बैंक तथा वित्तीय संस्थाहरुको साधारण सभा सम्पन्न भई गत आवको बोनस शेयर समेत बजारमा थपिएको छ । उच्च बिन्दुमा नेप्से रहेको बेला शेयर बिक्री र सस्तो मूल्यमा शेयर उठाउन रणनीतिमा बाठा लगानीकर्ता लग्दा नव प्रवेशी लगानीकर्ता बुल ट्रापमा पर्ने जोखिम बढेको हो । पछिल्ला दिनमा नेप्से सूचकसँगै निरन्तर कारोबार रकम समेत घट्दै गएको अवस्था छ ।

आइतबार बजार खुलको साढे ३ घण्टा अवधिमा २०७ कम्पनीका १ करोड ३४ लाख कित्ता शेयर ६ अर्ब ९५ करोड रुपैयाँमा खरीद बिक्री भएका छन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।