अधिकांश कम्पनीको शेयरमूल्य घटेपछि एकैदिन ८० अंकले झर्यो नेप्से, ८ अर्बमाथि कारोबार

कारोबारमा आएका अधिकांश कम्पनीको शेयरमूल्य घट्दा शेयर बजार परिसूचक मापक नेप्से आइतबार ३.१२ प्रतिशत अर्थात ७९.७४ अंकले घटेर २ हजार ४७४ दशमलव ३९ अंकमा झरेको छ ।

कोरोना भाइरस संक्रमणका कारण लगानीका अन्य क्षेत्रहरु खुम्चिएर बैंकिङ्ग प्रणालीको ब्याजदर न्यून भई सबैतिरबाट शेयर बजारमा भित्रिएको पार्किङ्ग मनि बाहिरिन थालेसँगै एकपछि अर्को दिन नेप्सेको घट्ने क्रम बढेको हो । बिहीबार ४४ अंकले घटेको नेप्से आइतबार ८० अंकले घटेको छ ।

आइतबार २०७ कम्पनीका १ करोड ६० लाख १७ हजार ३२२ कित्ता शेयर ९६ हजार १५१ पटक खरीद बिक्री हुँदा कारोबार रकम ८ अर्ब ३५ करोड ५२ लाख ८९ हजार ८१४ पुगेको हो ।

‘पार्किङ्ग मनि’ बाहिरिन थालेपछि दुई हजार ५०० बिन्दुभन्दा तल झर्यो नेप्से

कारोबारमा आएका चार कम्पनी र म्युचुअल फण्ड र डिबेञ्चर सहित जम्मा ११ कम्पनीको शेयरमूल्य बढेको आजको बजारमा होटल तथा पर्यटन उपसमूहको सूचक बाहेक सबै उपसमूहका सूचक ऋणात्मक रहे । यसदिन नेपाल इन्फ्रास्ट्रक्चर डेभलपमेन्ट बैंक (निफ्रा) को शेयरमूल्य साढे ६ प्रतिशतले घट्दा सो कम्पनी आवद्ध लगानी उपसमुहको सूचकमा पनि ४.१३ प्रतिशतको गिरावट आएको छ । अन्य, उत्पादनमुलक, जीवन बीमा, जलविद्युत र लघुवित्तको सूचक पनि ३ प्रतिशतभन्दा धेरैले घटेका छन् ।

आजको कारोबारमा चन्द्र्गिरी हिल्स, शिखर इन्स्योरेन्स, एनएलजी र सगरमाथा इन्स्योरेन्सको शेयरमूल्य बढ्दा लक्ष्मी उन्नति कोष, सिटिजन्स म्युचुअल फण्ड २, एनआईसी एशिया डिबेञ्चर ८२।८३, एसबिएल डिबेञ्चर २०८२, सनराइज डिबेञ्चर २०८०, र एनआईसी एशिया डिबेञ्चर २०८१।८२ को मूल्य बढेको हो । यसदिन १९३ वटा कम्पनीको शेयरमा लगानी गरेका लगानीकर्ताले गुमाएका छन् ।

यता आजको कारोबारबाट गणपति माइक्रोफाइनान्सका लगानीकर्ताले सबैभन्दा बढी७ प्रतिशतका दरले गुमाएका छन् । गुमाउने कम्पनीको सूचीमा नेपाल फाइनान्स, नेपाल इन्फ्रास्ट्रक्चर बैंक, नेपाल हाइड्रोपावर डेभलपर्स र अपि पावर कम्पनीको मूल्य ६ प्रतिशत धेरैले घटेका छन् ।

बरुण हाइड्रोपावर, लिवर्टी इनर्जी, रिडी हाइड्रोपावर, नेशनल र अरुण भ्याली हाइड्रोपार शीर्ष गुमाउने दश कम्पनीको सूचीमा परेका छन् । यी कम्पनीको साढे ५ प्रतिशत धेरैले मूल्य घटेको छ ।

उच्च अंकले घटेको बजारमा शिखर इन्स्योरेन्सको शेयरमा लगानीकर्ताको आकर्षण उच्च देखिएको छ । यसदिन शिखरको १ अर्ब २ करोड १६ लाख ३२ हजार रुपैयाँको शेयर कारोबार भएको हो । कम्पनीको ४ हजार १५९ पटकको कारोबारमा ३ लाख ५६ हजार २१४ कित्ता कारोबारमा आएको छ ।

यसैगरी नेपाल इन्फ्रास्ट्रक्चर डेभलपमेन्ट बैंकका ६३ करोड बढीको शेयर कारोबार हुँदा ग्लोबल आइएमई बैंक, पुनर्बीमा कम्पनी, र नेपाल लाइपल शीर्ष कारोबार हुने पाँच कम्पनीमा अटाएका छन् । एनआईसी एशिया बैंक, नबिल बैंक नेको इन्स्योरेन्स र प्रभु बैंकको पनि उच्च कारोबार भएको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।