फर्स्ट माइक्रोफाइनान्स वित्तीय विवरण प्रकाशनमा पनि पहिलो, खुद नाफा भने घट्यो

फर्स्ट माइक्रोफाइनान्स लघुवित्त वित्तीय संस्था लिमिटेड (FMDBL) ले नामजस्तै चालु आर्थिक वर्षको पहिलो त्रैमासको सबैभन्दा पहिला अपरिष्कृत वित्तीय विवरण सार्वजनिक गरेको छ ।

लघुवित्तले बिहीबार सार्वजनिक गरेको वित्तीय विवरण अनुसार असोज मसान्तसम्ममा लघुवित्तको खुद नाफा ०.२३ प्रतिशत अर्थात ६८ हजार रुपैयाँले घटेको छ ।

चालु आवको पहिलो त्रैमासमा लघुवित्तले २ करोड ९६ लाख ४८ हजार रुपैयाँ खुद नाफा कमाएको छ । गत आवको यसै अवधिमा २ करोड ९७ लाख १६ हजार रुपैयाँ खुद नाफा कमाएको थियो ।

खुद ब्याज आम्दानी घटेर सम्भावित कर्जा नोक्सानी जोखिम बापतको व्यवस्था रकम बढ्दा लघुवित्तको खुद नाफा प्रभावित भएको हो ।

लघुवित्तले तीन महिना अवधिमा ४ करोड ७९ लाख १८ हजार रुपैयाँ खुद ब्याज आम्दानी गरेको छ भने सम्भावित जोखिमबापत १ करोड ५२ लाख ६३ हजार रुपैयाँ छुट्याएको छ । अघिल्लो आवको यसै अवधिमा ५ करोड २७ लाख ५७ हजार रुपैयाँ खुद ब्याज गर्दा ४९ लाख ४० हजार नोक्सानी व्यवस्था गरेको थियो ।

यस्तै लघुवित्तको कोषको लागत बढ्दा ब्याज खर्च ८० प्रतिशतले बढ्दा खुद ब्याज आम्दानी घटेको अवस्था छ ।

समीक्षा अवधिमा लघुवित्तको चुक्ता पूँजी १० प्रतिशत, जगेडा कोष २२.६१ प्रतिशत, सापटी ६२.५३ प्रतिशत, र कर्जा लगानी ५४.८२ प्रतिशतले वृद्धि भएको छ । खुद ब्याज आम्दानी ९.१७ प्रतिशतले घटेको लघुवित्तले न्य सञ्चालन आम्दानी २८० र सम्भावित कर्जा नोक्सानी ब्यवस्था वापतको रकम २०८ प्रतिशतले बढेको छ ।

असोज मसान्तसम्मको वित्तीय विवरण अनुसार लघुवित्तको प्रतिशेयर आम्दानी १२.३० रुपैयाँ, प्रतिशेयर नेटवर्थ १२१.११ रुपैयाँ, कोषको लागत ७.४८ प्रतिशत, आधार ब्याजदर १०.२८ प्रतिशत र मूल्य आम्दानी अनुपात ७३.६० गुणा छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।