बेष्ट फाइनान्सको नाफा १२ करोड माथि, खुद ब्याज आम्दानी घटेपनि खराब कर्जा असुलीले बढायाे

बेष्ट फाइनान्स लिमिटेड (BFC) ले चालु आर्थिक वर्षको पहिलो त्रैमासमा १२ करोड ११ लाख ६० हजार रुपैयाँ खुद नाफा कमाएको छ । फाइनान्सको खराब कर्जा घटेसँगै नाफामा आकर्षक सुधार भएको हो ।

अघिल्लो आवको पहिलो त्रैमासमा फाइनान्स ८९ लाख ९९ हजार रुपैयाँ नोक्सानीमा रहेको थियो । असोज मसान्तसम्ममा फाइनान्सको चुक्ता पूँजी ८२ करोड ८९ लाख १३ हजार र प्रतिशेयर आम्दानी ५८.४७ रुपैयाँ छ ।

फाइनान्सको जगेडा कोष ९४.७१ प्रतिशत बढेर २१ करोड १ लाख पुगेको छ भने प्रतिशेयर नेटवर्थ १२५.३५ रुपैयाँ र मूल्य आम्दानी अनुपात ७.३४ गुणा छ ।

असोज मसान्तसम्म फाइनान्सको निक्षेप ४.३२ प्रतिशत र कर्जा लगानी ५३.११ प्रतिशतले बढेको छ । फाइनान्सले ३ अर्ब ९ करोड निक्षेप संकलन गरी २ अर्ब ७३ करोड रुपैयाँ कर्जा लगानी गरेको छ ।

त्यसैगरी, असोज मसान्तसम्ममा खुद ब्याज आम्दानी ३.५७ प्रतिशत घटेर २ करोड ७२ लाख ५९ हजारमा झर्दा सञ्चालन नाफा १३ करोड ८१ लख ६७ हजार पुगेको छ । १२ करोड ६६ लाख ९८ हजार रुपैयाँ इम्पेरमेन्ट चार्ज रिभर्स हुँदा फाइनान्सको सञ्चालन नाफासँगै खुद नाफामा उच्च बढोत्तरी आएको हो । फाइनान्सको वितरण योग्य मुनाफा भने २७ करोड २५ लाख रुपैयाँ ऋणात्मक छ ।

आम्दानीको मुख्य स्रोत खुद ब्याज आम्दानी घटेको र खराब कर्जा असुलीबाट नाफा वृद्धि भएको देखिएकाले नाफामा वृद्धिको आधारमा मात्रै फाइनान्सको प्रगतिलाई विश्लेषण गर्नु उचित देखिन्न् । फाइनान्सको नियमित बिजनेश खुम्चिएकाले फाइनान्सलाई आगामी दिनमा यसलाई सुधार गर्नुपर्ने चुनौति छ ।

फाइनान्सको निष्क्रिय कर्जा १४.२६ प्रतिशतबाट घटेर असोज मसान्तसम्म आइपुग्दा ४.०५ प्रतिशतमा सुधारिएको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।