राजश्व छलीमा संलग्न अग्रवाल विरुद्ध साढे ७ करोडको मुद्दा दायर

राजस्व अनुसन्धान विभागले भारतीय नागरिक अमितकुमार अग्रवाल विरुद्ध ७ करोड ६० लाख ६५३ हजार ७०४ रुपैयाँको बिगो तथा जरिवान मागदाबी सहित उच्च अदालत पाटनमा मुद्दा दायर गरेको छ ।

भारत पश्चिम बंगाल, सिलगुरी थाना स्थायी वतन ठेगाना भई हाल काठमाडौं महानगरपालिका वडा नम्बर १३ ताहाचलमा बसोबास गर्ने ३२ वर्षे अग्रवाल विरुद्ध विभागले मुद्दा दायर गरेको हो ।

विभागका अनुसार अग्रवालको विमला ईण्टरनेशनल फर्मले राजस्व चुहावट गर्ने मनसायले बिजक जारी नगरी अर्डर र इस्टिमेट लुज बिल जारी गरी मालसामान बिक्री गरि राजश्व छली गर्ने गरेको पाइएको छ ।

अग्रवालले उक्त फर्मबाट हुने आयलाई व्यवसायको आधिकारिक बिक्री आयमा समावेश नगरी नगद घरमै राख्ने गरेको तथा आयकर ऐन तथा मूल्य अभिवृद्धि कर ऐन तथा नियम अनुसार तिर्नुपर्ने राजस्व चुहावट गरेको विभागको ठहर छ।

अग्रवालले मूल्य अभिवृद्धि कर ३ करोड १७ हजार ९९ रुपैयाँ, आयकर ८ लाख १४ हजार ७५३ रुपैयाँ समेत जम्मा गरी कुल बिगो ३ करोड ८० लाख ३१ हजार ८५२ रुपैयाँ तथा शतप्रतिशत जरिवाना गरी ७ करोड ६० लाख ६३ हजार ७०३ रुपैयाँ बिगो तथा जरिवाना कायम गरेको छ ।

विभागले प्रतिवादी अमितकुमार अग्रवालसँग विगो असूल उपर गरी विगोको शतप्रतिशत जरिवाना तथा सोही ऐनको दफा २३ को उपदफा (१) (क) बमोजिम कैद सजाय हुन मागदावी लिई अभियोग पत्र दायर गरेको हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।