पाँच कारोबार दिनमा १४० अंकले घटेको नेप्से छैठौं दिनमा ३५ अंक बढ्यो

गत सातादेखि निरन्तर दोहोरो अंकको गिरावट आएको सेयर बजार यो साताको अन्तिम दिन बिहीबार ३५ अंक बढीले उकालो लागेको छ ।

बैंकिङ्ग प्रणालीमा तरलता अभावका बीच दबाबमा रहेको सेयर बजार राष्ट्र बैंकले चालेको पछिल्लो कदमका कारण थप प्रभावित भएको थियो । गत बिहीबारबाट लगातार घटेको बजार १४० अंक तल आइसकेपछि सस्तो मूल्यमा सेयर उठाउनेहरु सक्रिय हुँदा बजारमा सुधार आएको हो ।

साथै बैंकहरुले वैशाख पनि ब्याजदर नबढाउने अनौपचारिक खबरहरु प्रवाह भएकाले पनि यसको प्रभाव बजारमा देखिएको हो । आयातमा कडाई गर्दा कतिपयले शेयर बजारमा लगानी गरेको आँकलन पनि हुन थालेको छ ।

गत बुधबार ४० अंकले बढेको नेप्से त्यस यताका पाँच कारोबार दिनमा दैनिक दोहोरो अंकले घट्दै आएको हो । अघिल्लो बिहीबार करिब २४ अंकले घटेको नेप्से आइतबार ३०।८९, सोमबार १४.८८, मंगलबार ४६.४६ र बुधबार २३.३३ अंकले घटेको थियो ।

बिहीबार ३५.६६ अंकले बढेर २४६४.३१ अंकमा उक्लिएको छ । ठूला कम्पनीको कारोबार सूचक १.७९ प्रतिशतले बढेको छ । यस्तै करोबार रकम समेत केही बढेको छ । यसदिन २२४ कम्पनीका ५४ लाख ४४ हजार ७३८ कित्ता सेयर २ अर्ब १२ करोड १५ लाख बराबरमा किनबेच भयो । अघिल्लो दिन १ अर्ब ९९ करोड बराकरको सेयर खरिद बिक्री भएको थियो ।

कारोबारमा आएका १३ उपसमुहकै सूचक सकारात्मक रहेको बजारमा अन्य, व्यपार तथा बीमा समुहकाले धेरै कमाए । आजको बजारमा नबिल बैंकको सर्वाधिक ७ करोड ३८ लाख बराबरको सेयर किनबेच भयो । प्राइम बैंक, हिमालयन डिष्टलरी लगायतका कम्पनी उच्च कारोबार गर्नेमा परेका छन ।

यसदिन हिमालयन पावर पार्टनर र नेष्डो समृद्ध लघुवित्तको सेयरमूल्य १० प्रतिशतका दरले बढेको छ । नेपाल टेलिकम र एक्सल डेभलपमेन्ट बैंकको पनि ५ प्रतिशत बढीले मूल्य बढेको छ । राष्ट्र उत्थान लघुवित्त र इमर्जिङ्ग नेपाल लिमिटेडको सेयर मूल्य सबैभन्दा धेरै घटेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।