नेपाल लाइफको खुद बीमाशुल्क पौने २७ अर्बमाथि, खुद नाफा साढे ४४ करोड बढी

नेपाल लाइफ इन्स्योरेन्स लिमिटेडले चालु आर्थिक वर्षको तेस्रो त्रैमाससम्ममा २६ अर्ब ८३ करोड ९२ लाख १६ हजार रुपैयाँ खुद बीमाशुल्क संकलन गरेको छ ।

गत आर्थिक वर्षको तेस्रो त्रैमाससम्म इन्स्योरेन्सले २५ अर्ब ९९ करोड ७९ लाख २ हजार रुपैयाँ खुद बीमाशुल्क संकलन गरेको थियो । अपरिष्कृत वित्तीय विवरण अनुसार इन्स्योरेन्सको खुद बीमाशुल्क ३.२४ प्रतिशतले बढेको हो ।  इन्स्योरेन्सको व्यापार बढेसँगै नाफा पनि बढेको छ । गत आर्थिक वर्षको पहिलो ९ महिनामा १९ करोड ४५ लाख ६१ हजार रुपैयाँ ऋणात्मक रहेको इन्स्योरेन्सको खुद नाफा चैतसम्म ४४ करोड ६५ लाख ४९ हजार रुपैयाँ पुगेको छ ।

चुक्ता पुँजी ८ अर्ब २० करोड ७९ लाख ६६ हजार रुपैयाँ रहेको इन्स्योरेन्सको जगेडा कोषमा ४८ करोड ६७ लाख ७४ हजार रुपैयाँ, जीवन बीमा कोषमा १ खर्ब ५७ अर्ब १६ करोड ९१ लाख ९६ हजार रुपैयाँ र महाविपत्ती कोषमा ८३ करोड ३७ लाख १३ हजार रुपैयाँ सञ्चित छ । समीक्षा अवधिमा कम्पनीको जगेडा कोष ९.४० प्रतिशत, जीवन बीमा कोष १९.८२ र महाविपत्ती कोष १५.४९ प्रतिशतले बढेको छ ।

नाफा धनात्मक भएसँगै इन्स्योरेन्सको प्रति सेयर आम्दानी ३ रुपैयाँ १६ पैसा ऋणात्मकबाट ७ रुपैयाँ २५ पैसा धनात्मक भएको छ । इन्स्योरेन्सको प्रति सेयर नेटवर्थ ११६ रुपैयाँ १ पैसा र मूल्य आम्दानी अनुपात ९३.१९ गुणा छ । विवरण अनुसार इन्स्योरेन्सले ११ अर्ब ८२ करोड २४ लाख ५० हजार रुपैयाँ खुद दाबी भुक्तानी गरेको छ । गत आवको सोही अवधिमा इन्स्योरेन्सले १० अर्ब ६० करोड ८६ लाख ४ हजार रुपैयाँ दाबी भुक्तानी गरेकोमा ११.४४ प्रतिशतले बढेको हो ।

चालु आर्थिक वर्षको चैतसम्म कम्पनीले २९ अर्ब ५६ करोड ७८ लाख ६२ हजार रुपैयाँ बीमालेख धितोमा कर्जा प्रवाह गरेर १ अर्ब ३७ करोड ८७ लाख ९१ हजार आम्दानी गरेको छ । जुन अघिल्लो आवको सोही अवधिको तुलनामा २०.९१ प्रतिशतले धेरै हो । अघिल्लो आवको सोही अवधिमा २३ अर्ब २२ करोड ८६ लाख १५ हजार रुपैयाँ बीमालेख धितोमा कर्जा प्रवाह गरेर १ अर्ब ७४ करोड ३३ लाख ८० हजार आम्दानी गरेको थियो ।

कम्पनीले पुनरबीमा कमिशन वापत हुने आय १ करोड ८० लाख ५६ हजारबाट घटेर ४९ लाख ४१ हजार मात्र आम्दानी भएको छ । यस्तै लगानी कर्जा तथा अन्यबाट हुने आम्दानी ६ अर्ब ४७ करोड ६७ लाख २० हजारबाट २ अर्ब ७६ करोड ४१ लाख (२७.२९ प्रतिशत) रुपैयाँले बढेर ९ अर्ब २४ करोड ८ लाख ४५ हजार रुपैयाँ पुगेको छ ।

कम्पनीको कुल बीमाशुल्क २०.३६ प्रतिशत बढेको छ । गत आर्थिक वर्षको तेस्रो त्रैमासमा २६ अर्ब ४३ करोड ९७ लाख ६२ हजार रुपैयाँ रहेकोमा २७ अर्ब २५ करोड ७६ लाख ५८ हजार रुपैयाँ कुल बीमाशुल्क संकलन गरेको छ । सो अवधिसम्म नेपाल लाइफमा १० लाख १० हजार ८७६ बीमालेख कायम छन् । गत आवको सोही अवधिमा १३ लाख ९९ हजार ९०८ वटा रहेको थियो ।

चैत मसान्तसम्म कम्पनीले ६२ हजार ४३ वटा दाबी वापत १० अर्ब ९५ करोड ३४ लाख ९६ हजार भुक्तानी गरेको छ । गत आवको सोही अवधिमा ४८ हजार ९७५ वटा दाबी वापत ९ अर्ब ३३ करोड ९३ लाख ६ हजार भुक्तानी गरेको थियो । अब ८४ करोड ६३ लाख ६ हजार भुक्तानी गर्न बाँकी छ । नेपाल लाइफले बीमितलाई आव २०७८।७९ का लागि ५६ देखि ८२ रुपैयाँसम्मको बोनसदर निर्धारण गरेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।