नमस्ते पे क्यूआर मार्फत भुक्तानी गर्दा १० प्रतिशत क्यासब्याक पाइने

नेपाल टेलिकमका ग्राहकहरुले ‘नमस्ते पे’ को क्यूआर कोड मार्फत विभिन्न सेवाको बिल भुक्तानी गर्दा १० प्रतिशत क्यासब्याक प्राप्त गर्ने भएका छन् । नेपाल डिजिटल पेमेन्ट्सले सञ्चालन गर्दै आएको नमस्ते पेको क्यूआर कोड नेपाल टेलिकमको बबरमहल र सुन्धारामा अवस्थित कार्यालयको सबै काउन्टरमा उपलब्ध हुने छ ।

सोमबार एक कार्यक्रम गरी नेपाल टेलिकमको सुन्धारा र बबरमहलमा रहेको कार्यालयमा नमस्ते पेको क्यूआर मार्फत कारोबारको सुरुवात भएको प्रवक्ता शोभन अधिकारीले बताए । नेपाल टेलिकम, प्रादेशिक निर्देशनालय काठमाडौं, वागमती प्रदेशकी निर्देशक सविना मास्के प्रधान र नेपाल डिजिटल पेमेन्ट्स कम्पनीका सीईओ प्रवीणराज पोखरेलले यस सम्बन्धी सम्झौता पत्र आदानप्रदान गरी कारोबारको शुभारम्भ गरेका छन् ।

कार्यक्रममा बोल्दै निर्देशक प्रधानले नेपाल टेलिकमले आफ्नो काउन्टरहरुमा डिजिटल भुक्तानीलाइ प्रोत्साहन गर्न पहिलो पाइला चालेको बताइन् । प्रयोगकर्ताहरूले अब नमस्ते पे को क्यूआर प्रयोग गरेर बिल तिर्न सक्नेछन् । जसकारण नगद झिक्न बैंकमा जानुपर्ने झन्झट कम हुने र बिल भुक्तानीलाई सजिलो र छिटो हुने छ ।

यस्तै नेपाल डिजिटल पेमेन्ट्स कम्पनीका सीईओ प्रवीणराज पोखरेलले नमस्ते पे क्यूआर को प्रयोगले नगदरहित समाज सिर्जना गर्ने सरकारको प्रयासमा उल्लेख्य भूमिका खेल्ने बताए । आधुनिक प्रविधिक प्रयोग मार्फत सरल र सुरक्षित डिजिटल भुक्तानी सेवा प्रदान गरी बैंक र डिजिटल प्रविधिमा पहुँच भएका तथा नभएका सबै उपभोक्तालाई आधुनिक वित्तीय सेवा प्रदान गर्नका लागि यो सहकार्यको भूमिका महत्वपूर्ण रहने उनको धारणा रहेको छ ।

हाल नेपाल टेलिकमको सुन्धारा र बबरमहल काउन्टरमा उपलब्ध यो सेवा आगामी दिनमा अन्य कार्यालयहरुमा समेत विस्तार गर्ने टेलिकमका प्रवक्ता अधिकारीले बताए ।

नेपाल टेलिकम र राष्ट्रिय वाणिज्य बैंकको सहकार्यमा नेपाल डिजिटल पेमेन्ट्स कम्पनी मार्फत ‘नमस्ते पे’ सञ्चालन हुँदै आइरहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।