विकास बैंकको खुद नाफा ६ अर्ब १९ करोडमा खुम्चियो

अधिकांश विकास बैंकको नाफा घटेपछि गत आर्थिक वर्षमा नाफा घटेको छ । गत आवमा विकास बैंकहरुले ६ अर्ब १९ करोड ३ लाख ५१ हजार रुपैयाँ मात्र खुद नाफा आर्जन गरेका छन् । अघिल्लो आवको सोही अवधिमा विकास बैंकहरुले ६ अर्ब ६७ करोड ९० लाख रुपैयाँ खुद नाफा आर्जन गरेका थिए । समीक्षा अवधिमा विकास बैंकहरुको नाफा ६.६७ प्रतिशत घटेको हो ।

वित्तयि विवरण प्रकाशन गरेका १५ मध्ये ९ बैंकहरुको खुद नाफा घटेपछि समग्र नाफा प्रभावित बनेको हो । गत आवमा वित्तीय विवरण सार्वजनिक गरेका ६ वटाको बैंकको मात्र नाफा बढेको छ ।

मुक्तिनाथले कमायो सर्वाधिक, नारायाणी नोक्सानीमा

गत आवमा नारायणी डेभलपमेन्ट बैंकबाहेक सबै १४ विकास बैंकहरु नाफामा रहेका छन् । सप्तकोशी डेभलपमेन्ट बैंकले भने वित्तीय विवरण प्रकाशन गरेको छैन ।

विगतका वर्ष झै यस वर्ष पनि नाफामा एक अर्ब ३६ करोड ३८ लाख खुद नाफा गर्दै मुक्तिनाथ विकास बैंक शीर्ष स्थानमा रहेको छ । अघिल्लो आवको तुलनामा बैंकले गत आवमा १.६४ प्रतिशतले नाफा वृद्धि गरेको हो ।

यस्तै गरिमा विकास बैंकले अघिल्लो आवको तुलनामा १८.१९ प्रतिशतले नाफा वृद्धि गर्दै १ अर्ब २१ करोड ७३ लाख ७१ हजार रुपैयाँ आर्जन गरेको छ । यस्तै शाइन रेसुङ्गाले पनि २१.२९ प्रतिशतले नाफा वृद्धि गर्दै ७८ करोड ६८ लाख २६ हजार कमाएको छ ।

लुम्बिनी विकास बैंकको खुद नाफा भने ३.८८ प्रतिशत घटेर ६१ करोड २४ लाख ८२ हजारमा खुम्चिएको छ । ज्योति विकास बैंकले ५५ करोड ३२ लाख १हजार खुद नाफा आर्जन गरेको छ । जुन अघिल्लो आवको तुलनामा १७.४३ प्रतिशत कम हो ।

यसैगरी गत आवमा महालक्ष्मी विकास बैंकको खुद नाफा ४७.९५ प्रतिशत घटेर ४७ करोड ९ लाख ६२ हजारमा सीमित भएको छ ।कामना सेवा विकास बैंकको पनि गत आवमा २६.९३ प्रतिशतले नाफा घटेको छ । सो बैंकले ४३ करोड ११ लाख ९८ हजार खुद नाफा कमाएको छ । यस्तै सांग्रिला डेभलपमेन्ट बैंकको खुद नाफा ३४.८० प्रतिशतले घटेर ३४ करोड ३७ लाख २१ हजार कायम भएको छ ।

प्रादेशिक स्तरका विकास बैंकहरुमा मितेरी डेभलपमेन्ट बैंकले ८.४२ प्रतिशतले नाफा बढाउँदै १६ करोड २ लाख ९९ हजार नाफा कमाएको छ ।एक्सेल डेभलपमेन्ट बैंकको नाफा १२ करोड ६५ लाख ५७ हजार छ । अघिल्लो आवको तुलनामा बैंकले ३१.२१ प्रतिशतले नाफा बढाएको हो ।
अघिल्लो आवमा ३ करोड७९ लाख रुपैयाँ नोक्सानी ब्यहोरेको कर्णली डेभलपमेन्ट बैंकले गत आवमा ४ करोड ४३ लाख १३ हजार रुपैयाँ नाफा कमाएको छ । यता नारायणी डेभलपमेन्ट बैंकको खुद नाफा भने ५ करोड ४२ लाख ४८ हजारबाट ४६.२८ प्रतिशतले घटेर २ करोड ९१ लाख ४२ हजारमा संकुचित बनेको छ ।

कर्पोरेट डेभलपमेन्ट बैंकको खुद नाफा ३९८ प्रतिशत बढेर १ करोड ८५ लाख १४ हजार पुग्दा ग्रीन डेभलपमेन्ट बैंकको १ प्रतिशत घटेर १ करोड ८४ लाख ८९ हजार रहेको छ । सबैभन्दा कम नाफा कमाएको सिन्धु विकास बैकले १ करोड ३४ लाख ३ हजार रुपैयाँ खुद नाफा कमाएको छ । अघिल्लो आवमा ४ करोड ६३ लाख नाफा आर्जन गरेको बैंकको नाफा गत आवमा १७ प्रतिशत घटेको हो ।

गरिमा विकास बैंकको इपीएस सर्वाधिक, नारायणीको ११ रुपैयाँ धेरै ऋणात्मक

गरिमा विकास बैंकको वार्षिक प्रति सेयर आम्दानी (इपीएस) सर्वाधिक २३ रुपैयाँ ४७ पैसा रहेको छ भने मुक्तिनाथको २१ रुपैयाँ २४ पैसा छ ।अघिल्लो आवको तुलनामा गरिमाको इपीएस ९८ पैसा तथा मुक्तिनाथ विकास बैंकको ३४ पैसाले बढेको हो ।

यस्तै गत आवमा शाइन रेसुङ्गाको १८ रुपैयाँ ३७ पैसा, लुम्बिनी विकास बैंकको १८ रुपैयाँ ११ पैसा, मितेरी डेभलपमेन्टको १५ रुपैयाँ ७९ पैसा, कामना सेवाको १३ रुपैयाँ १४ पैसा, ज्योति विकास बैंकको १२ रुपैयाँ ५८ पैसा, महालक्ष्मी विकास बैंकको ११ रुपैयाँ २९ पैसा, सांग्रिला डेभलपमेन्ट बैंकको १० रुपैयाँ ५२ पैसा र एक्सेल डेभलपमेन्ट बैंकको १० रुपैयाँ १३ पैसा छ ।

गत आवमा कर्णाली डेभलपमेन्ट बैंकको ८ रुपैयाँ ८१ पैसा इपीएस कायम हुँदा कर्पोरेट डेभलपमेन्ट बैंकको ३ रुपैयाँ ५३ पैसा छ । यस्तै ग्रीन डेभलपमेन्ट बैंकको ३ रुपेयाँ ४२ पैसा छ । सिन्धु विकास बैंकको वार्षिक प्रति सेयर आम्दानी २ रुपेयाँ ४० पैसा रहँदा नाेक्सानीमा रहेकाे नारायणी डेभलपमेन्ट बैंकको वार्षिक इपीएस ११ रुपैयाँ २ पैसा ऋणात्मक रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।