केपी ओलीको लगानी रहेको त्रिशुली जलविद्युतको सेयर सूचीकृत, बुधबारदेखि कारोबार खुल्दै

तत्कालीन प्रधानमन्त्री तथा नेपाल कम्युनिष्ट पार्टी एमालेका अध्यक्ष केपी शर्मा ओलीको समेत लगानी रहेको त्रिशुली जलविद्युत आयोजनाको सेयर मंगलबार नेपाल स्टक एक्सचेञ्ज (नेप्से) मा सूचीकृत भएको छ ।

स्टकका अनुसार कम्पनीको प्रतिसेयर अंकित मूल्य १०० रुपैयाँ दरका कुल १ करोड ८५ लाख २५ हजार कित्ता सेयर मंगलबार सूचीकृत भएको हो । कम्पनीका अनुसार संस्थापक सेयरधनीले लगानी गरेको १ करोड ४८ लाख २० हजार कित्ता (८०%) प्रतिशत र सर्वसाधारणमा ३७ लाख ५ हजार कित्ता (कर्मचारी समेत) (२०%) गरी कुल १ करोड ८५ लाख २५ हजार कित्ता सेयर धितोपत्र विनियमावली २०७५ अनुसार सूचीकृत भएको हो ।

मंगलबार सेयर सूचीकृचरण भएसँगै कम्पनीको सेयर बुधबारदेखि धितोपत्रको दोस्रो बजारमा खरिद बिक्री सुरु हुनेछ । कम्पनीको सेयर कारोबारका लागि नेप्सेले न्यूनतम ८९ रुपैयाँ ३८ पैसादेखि अधिकतम २६८ रुपैयाँ १४ पैसासम्म कारोबार खुल्नेछ । कम्पनीको वास्तविक प्रतिसेयर नेटवर्थका आधारमा नेप्सेले तीन गुणासम्मको कारोबार रेञ्ज तोकेको हो । कम्पनीको धितोपत्र टिभिसिएल कारोबारमा खरिद बिक्रीमा आउनेछ ।

जनताको जलविद्युत आयोजनाको रुपमा आईपीओ निष्कासन गरेको उक्त कम्पनीको सेयरमा केपी शर्मा ओली र उनकी पत्नी राधिका शाक्यले १० हजार कित्ता माग गरेकोमा २० कित्ता सेयर प्राप्त गरेका थिए । तत्कालिन उर्जामन्त्री बर्षमान पुन, उनकी पत्नी ओनसरी घर्तिले पनि २० कित्ता नै शेयर पाएका थिए । मन्त्रालयका सचिवले पनि २० कित्ता नै सेयर पाएका थिए ।

कम्पनीको सेयर टिभिसीएल कारोबार संकेतमा लगानीकर्ताको मेरो सेयर खातामा जम्मा भैसकेको छ । सुरुमा १० रुपैयाँ संकलन गरेको उक्त कम्पनीको आईपीओको लागि अंकित मूल्यको बाँकी रहेको ९० प्रतिशत रकम माग गरेको समयमा पूर्ण रुपमा आवेदन नपर्दा सेयर सूचीकरणमा ढिलाई भएको हो । कम्पनीले २०७५ चैत्रमा प्रति सेयर एक सय रुपैयाँ अंकित मूल्यको न्यूनतम १० प्रतिशतले हुने ३७ लाख ५ हजार कित्ताका लागि (कम्पनीका कर्मचारीका लागि आरक्षण गरिएको समेत) १० रुपैयाँ मात्र संकलन गरेको थियो । कम्पनीले बाँकी ९० रुपैयाँको लागि २०७९ असोज ४ देखि २०७९ कार्तिक १७ गतेसम्म आवेदन खुलाएको थियो । २०७५ मा १० रुपैयाँ तिरेर आईपीओ खरिद गरेका सबै (१ लाख ५४ हजार ५५९ जना) लगानीकर्ताले २०७९ कार्तिकसम्म बाँकी ९० रुपैयाँको लागि आवेदन नदिएपछि सेयर सूचीकरणमा ढिलाई भएको हो । १० रुपैयाँमा सेयर भरेका सेयरधनीहरुले ७ करोड बराबरको सेयर खरिदका लागि आवेदन दिएनन् ।

आयोजनाका प्रवद्र्धक त्रिशुली जलविद्युत कम्पनी लिमिटेडमा प्राधिकरण र नेपाल टेलिकमको ३०-३० प्रतिशत संस्थापक सेयर छ । कम्पनीमा रसुवा तथा नुवाकोटका गाउँपालिका र नगरपालिकाको ५ प्रतिशत, रसुवा तथा नुवाकोटका स्थानीय वित्तीय संस्थाको ५ प्रतिशत, रसुवा तथा नुवाकोटबासीको १० प्रतिशत, सर्वसाधारणको १५ प्रतिशत र प्राधिकरण तथा टेलिकमका कर्मचारीको ५ प्रतिशत सेयर रहेको छ ।

आयोजनाको कुल अनुमानित लागत निर्माण अवधिको व्याज बाहेक ७ अर्ब ४४ करोड ५६ लाख ४८ हजार रुपैयाँ रहेको छ । आयोजना प्रगति करिब ७० प्रतिशत सम्पन्न भएको र आगामी १ वर्ष भित्रमा विद्युत उत्पादन लक्ष्य कम्पनीको छ। कम्पनीले रसुवा र नुवाकोटको सिमानामा ३७ मेगावाट क्षमताको माथिल्लो त्रिशूली ३ बी जलविद्युत आयोजना निर्माण गरिरहेको छ ।

कम्पनीको सेयर सूचीकरण पश्चात दिनुपर्ने आरटिएस सेवा ग्लोबल आईएमई लिमिटेड नक्सालबाट काठमाण्डांबाट हुनेछ। कम्पनीको प्रधान कार्यालय वनस्थली काठमाण्डौंमा रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।