बाँडफाँड भएको तीन महीनापछि सूचीकृत भयो “हिमालयन ८०–२०”

हिमालयन बैंक लिमिटेड कोष प्रवद्र्घक रहेको हिमालयन म्युच्युअल फण्ड अन्तर्गतको पहिलो बन्दमुखी योजना “हिमालयन ८०–२०” बाँडफाँड भएको तीन महीनापछि बल्ल नेपाल स्टक एक्सचेञ्ज (नेप्से) मा सूचीकृत भएको छ ।

हिमालयन म्युचुअल फण्डको पहिलो बन्दमुखी योजनाको १० करोड इकाई मङ्सिर २७ गते बुधबार नेप्सेमा सूचीकृत भएको हो । उक्त इकाईको बाँडफाँड भदौ २६ गते भएको थियो । हिमालयन क्यापिटलको व्यवस्थापनमा सञ्चालनमा आएको यस योजनाको प्रति इकाई अंकित मूल्य १० रुपैयाँको दरले १० करोड इकाईले हुन आउने कुल रकम एक अर्ब रुपैंया बराबरको इकाई बिक्रीमा ल्याएको थियो ।

धितोपत्र सूचीकरण सम्झौता सम्पन्न भएको दोस्रो दिनबाट नेप्से मार्फत फन्डको इकाईको दोस्रो बजारको कारोबार सुरु हुने व्यवस्था छ । सोही अनुसार बुधबार सूचीकृत भएसँगै बिहीबारदेखि उक्त म्युचुअल फन्डको इकाई एच ८०२० () कारोबार संकेतमा खरिद बिक्रीमा आउनेछ ।
धितोपत्र सूचीकरण विनियमावली, २०७५ बमोजिम मङ्सिर २२ गतेको निर्णयानुसार नेपाल स्टक एक्सचेञ्ज लिमिटेडमा फन्डको इकाई सूचीकरण गरिएको हो ।

“हिमालयन ८०—२०” नामक योजनाको कुल लगानी मध्ये ८०% पुँजी तथा वित्त बजारका दीर्घकालीन लगानी मार्फत कम्पाउन्डिङ्ग प्रतिफल सहितको मुनाफा आर्जन गर्ने तथा बाँकी २०% पुँजी तथा वित्त बजारको उतार चढावमा प्रतिबिम्बित भई सक्रिय लगानी व्यवस्थापन गर्ने क्यापिटलले जनाएको छ । सन १९९३ मा स्थापना भई बिगत ३० वर्षदेखि आफ्ना ग्राहक वर्गमा विभिन्न सेवा प्रदान गर्दै आएको हिमालयन बैंक देशको अग्रणी वित्तिय संस्था मध्ये एक हो । कोष व्यवस्थापक, हिमालयन क्यापिटल लिमिटेडले यस सामुहिक लगानी कोषको व्यवस्थापन राष्ट्रिय तथा अन्तर्राष्ट्रिय पुँजी बजारको नविनतम तथा उत्तम अभ्यासहरू अपनाई गर्ने जनाएको छ ।

फन्ड व्यवस्थापक हिमालयन कयापिटलको प्रधान कार्यालय काठमाडौं महानगरपालिका वडा नम्बर २८ ठमेल काठमाडौंमा रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।