धितोपत्र बोर्डको व्यवस्थापछि प्रभु महालक्ष्मी लाइफको सेयरमा पहिलो लकइन पिरियड खुल्दै

धितोपत्र बोर्डले लक इन अवधि सकिनु अगावै सो को जानकारी गराउनुपर्ने व्यवस्थापछि प्रभु महालक्ष्मी लाइफ इन्स्योरेन्सको सेयरमा पहिलो लकइन पिरियड खुल्ने भएको छ ।

प्रभु महालक्ष्मी लाइफ इन्स्योरेन्सले बुधबार एक सूचना जारी गर्दै २०८० पुस ९ गतेदेखि इन्स्योरेन्सको लकइनमा रहेको संस्थापक तथा कर्मचारीमा वितरण गरिएको सेयरको लकइन पिरियड खुल्न लागेको जनाएको हो ।

कम्पनीले संस्थापक र कर्मचारीको गरि कुल ३ करोड ३ लाख ५६ हजार १०६ कित्ता सेयरको लक इन अवधिको पुस ९ गते समाप्त हुने जनाएको छ । कम्पनीका अनुसार संस्थापकतर्फको कुल ३ करोड ६३ लाख ७२ हजार कित्तामध्ये ३ करोड १ लाख १ हजार ७० कित्ता संस्थापक सेयरको लक इन अवधि समाप्त हुने छ । त्यस्तै कर्मचारीतर्फको कुल ३ लाख २८ हजार ९ सय ९८ कित्ता सेयरमध्ये २ लाख ५५ हजार ३६ कित्ता सेयरको लक इन अवधि समाप्त हुने जनाएको हो ।

लकइनमा रहेका सेयरहरु एकाएक खुलेर कारोबार हुँदा सर्वसाधारण लगानीकर्ता फस्ने डर भएको भन्दै विरोध भएपछि बोर्डले लक इन अवधि सकिनु अगावै पारदर्शी हिसाबले जानकारी दिनुपर्ने व्यवस्था गरेको हो ।

धितोपत्र बोर्डको सञ्चालक समिति बैठकले ‘लकइन’मा रहेको सेयर दोस्रो बजारमा कारोबार खुल्नुभन्दा ३० दिनअघि नै लगानीकर्ता र सरोकारवालाई सूचना जारी गरेर जानकारी गराउनुपर्ने निर्णय गर्दै मङ्सिर २५ गते सार्वजनिक सूचना प्रकाशित गरि जानकारी दिएको थियो । यस्तो जानकारी सम्बन्धीतथ कम्पनीले ३० दिनसम्म वेवसाइटमा राख्नुपर्ने तथा धितोपत्र बोर्ड, नेप्से र सिडिएस एण्ड क्लियरिङ्ग लिमिटेडलाई पनि उपलब्ध गराउनुपर्ने निर्देशन दिइएको थियो ।

बोर्डले सुचीकृत संगठित संस्थाहरुले लक इन पिरियड खुल्नुअघि ३० दिन कुन समुहको सेयर हो ? कसले कति कित्ता सेयर बेच्ने हो ? सोको सम्पूर्ण विवरण नेप्से र सीडीएससीको वेभसाइटमा एक हप्तासम्म राख्नुपर्ने नियम लागू गरेको थियो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।