रिलायन्स स्पिनिङ मिल्सले सेबोनसँग माग्यो आईपीओ बिक्री अनुमति, ८२० रुपैयाँ ८० पैसामा आउने

रिलायन्स स्पिनिङ मिल्स लिमिटेडले प्रतिकित्ता ८२० रुपैयाँ ८० पैसाका दरमा सर्वसाधारणलाई आईपीओ निष्कासन गर्न नियामक निकाय नेपाल धितोपत्र बोर्ड (सेबोन) सँग अनुमति मागेको छ ।

कम्पनीले बुक विल्डिङ विधिबाट कुल ११ लाख ५५ हजार ९६० कित्ता सेयर निष्कासन गर्न माघ २३ गते सेबोनमा निवेदन दिएको हो । यसअघि कम्पनीले योग्य संस्थागत लगानीकर्तालाई ७ लाख ७० हजार ६४० कित्ता सेयर निष्कासन गरेको थियो । योग्य संस्थागत लगानीकर्तालाईलाई निष्कासन गरिएको सेयरको कट अफ मूल्य ९१२ रुपैयाँ कायम भएपछि कम्पनीले त्यसको १० प्रतिशत कम मूल्यमा सर्वसाधारणमा आईपीओ जारी गर्न निवेदन दिएको हो ।

सुनसरीको दुहबी र खनारमा औद्योगिक कारखाना रहेको कम्पनीमा गोल्यान ग्रुपका पवन गोल्यान यस कम्पनीका कार्यकारी अध्यक्ष छन् । कम्पनीले अन्तराष्ट्रिय गुणस्तरको पोलिस्टर, भिसकोस, एक्रिलिक यार्न लगायत सिउने धागोहरु विभिन्न ब्लेन्डमा उत्पादन गर्दै आएको छ । कम्पनीले आफ्ना उत्पादनलाई टर्की र भारतमा निर्यात गर्दै आएको छ । २०५१ सालदेखि सञ्चालनमा रहेको उद्योगले ४ हजार ३०० जना बढीलाई रोजगारी दिएको छ ।

कम्पनीको धितोपत्र निष्कासन तथा बिक्री प्रबन्धक ग्लोबल आईएमई क्यापिटल नक्साल रहेको छ ।

सर्वोत्तम सिमेन्टले यसअघि नै बुक विल्डिङ विधिबाट आईपीओ जारी गर्न पहिलो कम्पनीको रुपमा अनुमति पाइसकेको छ । कम्पनीले प्रतिसेयर ३६० रुपैयाँ ९० पैसाका दरले वैदेशिक रोजागारीमा रहेका नेपाली र स्थानीय बासिन्दाका लागि आईपीओ बिक्रीमा ल्याइसकेको छ । सर्वसाधारणमा भने जारी हुन बाँकी छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।