कर्जा प्रक्रिया सहज हुने आशाले शेयर कारोबारमा रेकर्ड

सरकारले यस अघि लागू गरेको कर्जा प्रक्रिया लगायतका केही नीतिगत व्यवस्थाहरु सहज बनाउने संकेत दिदा शेयर लगानीकर्ता समेत उत्साहीत हुँदा हालसम्मकै दोस्रो उच्च कारोबार भएको छ ।

सोमबार अर्थमन्त्री, राष्ट्र बैंकका अधिकारी, वाणिज्य बैंकहरुका प्रमुख कार्यकारीहरु लगायत सरोकारवाला निकायहरुकोसँगेको छलफलमा बैंकिङ् प्रणालीमा देखिएका समस्या समाधान गर्न तत्काल पहल थाल्ने निष्कर्ष आएपछि शेयर लगानीकर्ता समेत उत्साहीत भएका हुन् ।

सरकारले कर्जा लिंदा करचुक्ताको प्रमाणपत्र अनिवार्य हुनुपर्ने व्यवस्था हटाउनका साथै स्प्रेड दर गणनाको विधि लगायतका व्यवस्थाहरु परिमार्जन गर्ने संकेत गरेको छ । तरलताको अवस्था सहज बनाउनुका साथै कर्जा प्रणालीमा सुधार गर्ने अर्थमन्त्रीको प्रयासको प्रभावले सुधारउन्मुख बजारमा उछाल आएको हो ।

साथै आगामी मौद्रिक नीति मार्फत शेयर बजारका लागि समेत केही सकारात्मक सन्देशहरु आउने संकेत र विस्वास बढ्दा शेयर कारोबारमा उत्साह जागेको विश्लेषकहरु बताउँछन् । शेयर बजार निरन्तर उकालो लाग्दै बजारमा नयाँ नयाँ लगानीकर्ताको प्रवेशको क्रम समेत बढेको छ । जसले कारोबार रकम उच्च हुन पुगेको ब्रोकरहरु बताउँछन् ।

सोमबार नेप्सेमा १७५ कम्पनीको ६४ लाख ७४ हजार ७५० कित्ता शेयर २ अर्ब ६८ करोड ७५ लाख बराबरमा किनबेच भएको छ । यो कारोबार रकम हालसम्मकै दोस्रो उच्च हो  । यसअघि २०७३ साउन ११ गते हालसम्मकै सर्वा्धिक २ अर्ब ७५ करोड ३७ लाख रुपैयाँ बराबरको शेयर किनबेच भएको थियो।

नेप्से सूचक ३४.२६ अंकले बढेर १३९८.२४ विन्दुमा पुगेको छ । कारोबार चलिरहँदा नेप्से सूचक एक समय १४०४ अंकसम्म पुगेको थियो ।सोमबार कायम नेप्सेको बिन्दु २०७५ बैशाख १२ गते पछिको उच्च बिन्दु हो । सो दिन नेप्से १ हजार ३८६ बिन्दुमा रहेको थियो।

यसदिन सबैभन्दा धेरै शिवम सिमेन्ट झण्डै १३ करोड बराबरको शेयर किनबेच भयो । शिखर इन्स्योरेन्स र हिमालयन डिष्टिलरीको पनि दश करोड बढीको किनबेच भयो ।