अनलाइन प्रयोगकर्ताको संख्या ३१ हजार नाघ्यो, कति छन् लगानीकर्ता ?

नेपाल स्टक एक्सचेन्जका अनुसार अनलाइन प्रयोगकर्ता अर्थात अनलाइन शेयर कारोबारका लागि युजर पासवर्ड लिने लगानीकर्ताको संख्या ३१ हजार नाघेको छ। 

शेयर बजारमा १७ लाख बढी लगानीकर्ताहरु रहेको प्रचार प्रसार गरिएपनि अनलाइनमा जोडिनेसंख्या भने भर्खर ३१ हजार ९८८ पुगेको छ ।

डिम्याट खाता खोलेकै आधारमा १७ लाख बढी लगानीकर्ता भनिदै आएको छ । हालसम्म १७ लाख ११ हजार ९८० डिम्याट खाता खोलिएका छन् ।

पछिल्लो समयमा निष्काशन भएका केहि आईपिओमा परेको आवेदन हेर्ने हो भने चार लाखको हाराहारीमा आईपिओमा आवेदन पर्ने गरेको छ । यसको आधारमा धितोपत्रको प्राथमिक बजारमा भर्खर चार लाख लगानीकर्ता पुगेको मान्न सकिन्छ ।

तर नियमित शेयर कारोबार गर्नेका संख्या भने निकै कम छ । अनलाइन कारोबारका लागि खुलेका खाता र नेप्सेमा दैनिक हुने कारोबार हेर्दा शेयर बजारमा ५० हजार जति सक्रिय लगानीकर्ता रहेको र तिमध्ये ६ देखि ७ हजारले मात्र नियमित कारोबार गर्ने गरेको देखिन्छ ।

नेप्सेका अनुसार अनलाइन ग्राहक सबैभन्दा बढी ब्रोकर नं ३४ भिजन सेक्युरिटीजमा २ हजार १६८, ब्रोकर नं ३५ कोहिनूर इन्भेष्टमेन्ट एण्ड सेक्युरिटीजमा १ हजार ९८० रहेका छने । भिजन सेक्युरिटीजमा मात्रै २ हजार बढी अनलाइन ग्राहक रहेका छन्। हालसम्म ५ ब्रोकरमा १५ सय बढी, ११ ब्रोकरमा हजार बढी अनलाइन ग्राहक छन्।

सबैभन्दा कम ब्रोकर नं १ सगरमाथा सेक्युरिटीजका अनलाइन प्रयोगकर्ता ११७ रहेका छन्। चार ब्रोकर कम्पनीमा हालसम्म पनि अनलाइन प्रयोगकर्ताको संख्या २०० नाघ्न सकेको छैन् ।