पछिल्लो एक महिनामा ५५ हजार अनलाइन प्रयोगकर्ता थपिए, सक्रिय लगानीकर्ता ३ लाख ३७ हजार

नेपालको शेयर बजारमा प्रविधिको प्रयोग बढ्न थालेपछि अनलाइन प्रयोगकर्तासँगै सक्रिय लगानीकर्ताहरुको संख्या निरन्तर बढ्न थालेको छ । पछिल्लो एक महिनामा मात्रै अनलाइन मार्फत शेयर कारोबार गर्न युजर लिनेको संख्या करिब दोब्बर पुगेको हो ।

नेप्सेका अनुसार गत भदौ ११ गते अनलाइन प्रयोगकर्ताको संख्या ६४ हजार ६१६ रहेकोमा असोज १४ गते आइपुग्दा सो संख्या बढेर १ लाख २० हजार ४९९ पुगेको हो । पछिल्लो एक महिनामा मात्रै ५५ हजार ८८३ जनाले अनलाइन लिएका हुन् ।

हालसम्म शेयर बजारमा सक्रिय लगानीकर्ताको संख्या ३ लाख ३७ हजार ३६० पुगेको छ । भदौ ११ गते बिहीबारसम्म २ लाख ८७ हजार ८५४ रहेकोमा पछिल्लो एक महिनामा सक्रिय लगानीकर्ताको संख्या ४९ हजार ५०६ ले बढेको छ ।

पछिल्लो चरणमा प्राथमिक बजारमा ८ लाख बढी लगानीकर्ताहरुले शेयर आवेदन गर्ने गरेका छन् । आजै निष्काशन बन्द भएको जनरल इन्स्यारेन्सको आईपीओमा हालसम्मकै सबैभन्दा बढी ८ लाख १४ हजारले आवेदन गरेका छन् ।

लकडाउनपछि नियामक निकायले अनलाइन कारोबारलाई प्रोत्साहन गर्न थालेपछि दोस्रो बजारमा अनलाइन मार्फत कारोबार गर्ने लगानीकर्ताको संख्या समेत निरन्तर बढ्न थालेको हो । धितोपत्र बोर्डले नयाँ आर्थिक वर्ष सुरु भएयता अनलाइन शेयर कारोबारलाई जोड दिँदै आएको छ ।

बोर्डले लगानीकर्ताहरूले शेयर खाताको शेयर ट्रान्सफर र रकम ट्रान्सफर गर्दा विद्युतीय माध्यमको प्रयोग गर्न प्रोत्साहित गरेपछि अनलाइन लिनेहरुको संख्या ह्वात्तै बढेको हो ।

सिडिएस एण्ड क्लियरिङ लिमिटेडका अनुसार हालसम्म २० लाख ०४ हजार ७५९ डिम्याट खाता खुलेका छन । यीमध्ये ८ लाख बढी लगानीकर्ताले प्राथमिक बजारमा शेयर भर्ने गरेका छन् । पछिल्लो चरणमा निष्काशन भएको आईपीओमा ८ लाख १४ हजारसम्म आवेदन परेको पाइएको छ । यी मध्येमा दोस्रो बजारमा सक्रिय कारोबार गर्ने लगानीकर्ताको संख्या ३ लाख ३७ हजार देखिन्छ । कूल सक्रिय प्रयोगकर्ताको आधारमा हेर्दा अनलाईन प्रयोगकर्ता ३५.७२ प्रतिशत हुन आउँछ ।

कुन ब्रोकरमा कति अनलाइन प्रयोगकर्ता ?

नेप्सेका अनुसार अनलाइन ग्राहक सबैभन्दा बढी ब्रोकर नं ५८ नासा सेक्युरिटीजमा १० हजार ७९० रहेका छन् । यस्तै दोस्रोमा रहेको ब्रोकर नं ४२ सनी सेक्युरिटीजमा १० हजार ५०८ अनलाइन प्रयोगकर्ता छन् ।

यसैगरी ब्रोकर नं ३८ दिपशिखामा ७ हजार ६६३ अनलाइन प्रयोगकर्ता रहेका छन् । ब्रोकर नं ३४ भिजन सेक्युरिटीजमा मात्रै ५ हजार ९२३ अनलाइन ग्राहक रहेका छन्। । हालसम्म दुई ब्रोकरमा १० हजार बढी र र १८ वटा ब्रोकरमा २ हजार बढी अनलाइन ग्राहक छन्।

सबैभन्दा कम ब्रोकर नं १८ सगरमाथा सेक्युरिटीजका अनलाइन प्रयोगकर्ता २४२ रहेका छन । ८ वटा ब्रोकर कम्पनीमा हालसम्म पनि अनलाइन प्रयोगकर्ताको संख्या १ हजारभन्दा कम छ । २२ वटा ब्रोकरमा १ हजारभन्दा धेरै २ हजारभन्दा कम अनलाईनका ग्राहक छन् ।