म्युचुअल फण्ड र जलविद्युतमा चमक आउँदा पौने ९ अर्बको शेयर कारोबार

म्युचुअल फण्ड र जलविद्युत उप समुहमा उछाल आएको आइतबार बजारमा बैंकिङ्ग र बीमा ऋणात्मक भएपनि पौने ९ अर्बको शेयर कारोबार भएको छ ।

सेन्सेटिभ सूचक २.२० अंकले ऋणात्मक भएको बजारमा नेप्से सूचक भने ३.६६ अंकले बढेर २ हजार ६४० दशमलव ३४ बिन्दुमा पुगेको छ । आज २०७ कम्पनीका २ करोड ४३ लाख ५ हजार ६६ कित्ता शेयर ९३ हजार ३९ पटक खरीद बिक्री हुँदा ८ अर्ब ८३ करोड ४६ लाख ३ हजार ९६७ रुपैयाँको शेयर खरीद बिक्री भएको छ ।

आज कारोबारमा आएका म्युचुअल फण्ड, जलविद्युत, अन्य, विकास बैंक, होटल, ब्यापार र उत्पादन उपसमुहमा हरियाली छाउँदा जीवन बीमामा सबैभन्दा धेरै १.९६ प्रतिशतको गिरावट आएको छ । लघुवित्त, निर्जीवन बीमा, बैंकिङ र वित्त ऋणात्मक रहे ।

• नेपाल बैंकको सर्वाधिक कारोबार

आइतबारको बजारमा नेपाल बैंकको सबैभन्दा धेरै शेयर कारोबार भएको छ । बैंकको १३ लाख ६७ हजार कित्ता शेयर ६१ करोड ४२ लाख रुपैयाँमा खरीद बिक्री भएको हो ।

यसैगरी निफ्राको ५३ करोड ८३ लाख, ग्लोबल आईएमई बैंक र एनआईसी एशिया बैंकको पनि ३० करोड बढीको शेयर कारोबारमा आयो । शिखर इन्स्योरेन्स, नबिल बैंक, नेपाल लाइफ, सिभिल बैंक, अपर तामाकोशी र नागरिक लगानी कोषको पनि उच्च कारोबार भएको छ ।

• सात कम्पनीको शेयरमूल्यमा सकारात्मक सर्किट ब्रेक

आजको बजारमा सात कम्पनीको शेयरमूल्यमा सकारात्मक सर्किट ब्रेक लागेको छ । अपर तामाकोशी, शिवश्री हाइड्रोपावर, निफ्रा, नेपाल हाइड्रो डेभलोपर कम्पनी, चन्द्रागिरी हिल्स, समृद्धि फाइनान्स र एनआईसी एशिया ब्यालेन्स्ड फण्डको इकाईमूल्य करिब १० प्रतिशतले बढेर सर्किट लागेको हो ।

लिवर्टी इनर्जी र सानिमा इक्वीटी फण्डको इकाईमूल्य पनि ७ प्रतिशत धेरैले बढोत्तरी भएको छ ।

• यी हुन् गुमाउने कम्पनी

आइतबारको बजारमा दश कम्पनीको शेयरमूल्य ३ प्रतिशतभन्दा धेरैले घटेको छ । बेष्ट फाइनान्स, एभरेष्ट इन्स्योरेन्स संस्थापक, किसान लघुवित्त, सबैको लघुवित्त, समीट, फरवार्ड कम्युनिटी, लाइफ इन्स्योरेन्स कर्पोरेसन, लक्ष्मी लघुवित्त, सनराइज र लक्ष्मी बैंकको शेयरमूल्य चार प्रतिशतभन्दा कम तीन प्रतिशतभन्दा धेरैले घटेको हो ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।