नेप्सेमा ४० अंकको ‘बाउन्स ब्याक’, ६ कम्पनीको शेयरमूल्यमा सर्किट

शेयर बजार सूचक मापक नेप्से बुधबार ४०.४० अंकले फर्किएको छ । लगातार ५ कारोबार दिनमा ११७ अंकले घटेको नेप्सेमा मंगलबार २.५६ अंकको झिनो सुधार आएकोमा बुधबार उच्च अंकको वृद्धि देखिएको हो ।  गिरावटपछि आएको बाउन्स ब्याकमा ६ कम्पनीको शेयरमूल्य ९ प्रतिशतभन्दा धेरै बढेर सकारात्मक सर्किट लागेको छ ।

सूचक बढेसँगै नेप्से २ हजार ५३२.२४ बिन्दुुमा पुगेको छ । बुधबार २१२ कम्पनीका ८६ लाख २६ हजार ६६७ कित्ता शेयर ४४ हजार ६९७ पटकको कारोबारबाट कारोबार रकम ३ अर्ब ३७ करोड ४५ लाख ५२ हजार १७८ रुपैयाँ पुगेको छ । मंगलबारको तुलनामा बुधबार १२ लाख कम कारोबार भएको छ ।

कारोबारमा आएका सबै समुहका सूचकमा हरियाली छाएको बजारमा होटल तथा टुरिजम्को इन्डेक्स सर्वाधिक ४.२६ प्रतिशतले बढेको छ । लघुवित्त, अन्य, र जीवन बीमाको सूचकमा २ प्रतिशत धेरेको सुधार देखिएको छ भने म्युचुअल फण्ड १ प्रतिशतभन्दा कम बढ्दा बाँकी सबै १ प्रतिशत बढीले बढेका छन् ।

• निफ्राको उच्च कारोबार

बुधबारको बजारमा नेपाल इन्फ्रास्टक्चर डेभलपमेन्ट बैंक (निफ्रा)को उच्च कारोबार भएको छ । बैंकको ३ लाख ७८ हजार १७ कित्ता शेयर २० करोड रुपैयाँमा खरीद बिक्री भएको हो ।

यसैगरी नेपाल लाइफ, एचआईडिसीएल, अपर तामाकोशी, एनटिसी, नबिल बैंक, प्रभु बैंक संस्थापक, नेपाल बंगलादेश बैंकको १० करोड बढीको शेयर कारोबारमा आएको छ । नेको इन्स्योरेन्स र ग्लोबल आइएमई बैंकको पनि उच्च कारोबार भएको छ ।

• छ कम्पनीको शेयरमूल्यमा सर्किट

बुधबारको बजारमा ६ कम्पनीको शेयरमूल्य करिब दश प्रतिशत बढेर सकारात्मक सर्किट लागेको छ । यसदिन चन्द्रागिरी हिल्स, जोशी हाइड्रोपावर, ग्रीन लाइफ हाइड्रोपावर, युनाइटेड इदिमर्दी, पन्चकन्या माई हाइड्रोपावर र खानीखोला हाइड्रोपावरको शेयरमूल्य ९ प्रतिशत धेरै बढेको हो ।

यसैगरी युनियन हाइड्रोपावर, कालिका पावर, आरएमडिसी लघुवित्त, समिट लघुवित्त, पाँचथर पावर, एचआईडिसिएल, दिश्यश्वरी हाइड्रोपावर, नेपाल बंगलबादेश बैंक, लाइफ इन्स्योरेन्स कर्पोरेशन, सारथी नेपाल लघुवित्त, कर्णाली विकास बैंक, र गुराँस लघुवित्तको शेयर ५ प्रतिशतभन्दा धेरै बढेको हो ।

• घलेम्दी हाइड्रोपावरका शेयरधनीले धेरै गुमाए

बुधबारको बजारमा घलेम्दी हाइड्रोपावरको शेयरमूल्यमा ८.९५ प्रतिशतले घटेको छ । गुडविल फाइनान्स, गुहेश्वरी फाइनान्स, नेशनल हाइड्रोपावर, बैंक अफ काठमाण्ठू, पोखरा फाइनान्स र हिमालयन उर्जा विकास कम्पनीको शेयरमूल्य पनि सामान्य घटेको छ ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।