नेप्से पुनः ओरालो यात्रामा, ३२ अंकले घटेको बजारमा ४ कम्पनीका लगानीकर्ताले भने कुस्त कमाए

आइतबार र सोमबारको ७३ अंकको गिरावटपछि मंगलबार सामान्य सुधार आएको नेप्सेमा बुधबार फेरि ३२.४१ अंकको उच्च गिरावट आएको छ ।

बुधबार नेप्से २ हजार ६३२.१० अंकमा झरेर बन्द भएको छ । यसदिन २०९ कम्पनीका १ करोड ३७ लाख ८७ हजार २१८ कित्ता शेयर ६६ हजार ४८० पटक खरीद बिक्री हुँदा कारोबार रकम ५ अर्ब ७७ करोड २२ लाख ५१ हजार २०३ रुपैयाँ पुगेको छ । उक्त करोबार रकम मंगलबारको तुलनामा २३ करोड ३६ लाख रुपैयाँले बढेको हो ।

ओपनिङ्गदेखि नै तीब्र दबाब झेलेको सूचक अन्तिमसम्मै घटेर बन्द भएको हो । यद्यपी ऋणात्मक बजारमा पनि ४ कम्पनीको शेयरमा लगानी गरेका लगानीकर्ताले भने कुस्त रुपमा कमाएका छन् । ती कम्पनीको शेयरमूल्य सर्किट लेबलमा बढेको छ ।

बजारका सक्रिय लगानीकर्ताहरु बजारमा आएको करेक्शन सामान्य रहेको बताउँछन् । अल्पकालीन लगानीकर्ताहरु हाबी हुँदा बुधबार फेरि बजारले ओरालो यात्रा समातेको उनीहरुको विश्लेषण छ ।

दोस्रो बजारमा एक दशकदेखि सक्रिय लगानीकर्ता वेदनाथ घिमिरेले भनेः- “शेयर बजारको सौन्दर्यता भनेकै बढ्नु र बढेपछि घट्नु हो । अल्पकालीन लगानीकर्ताले एउटा निश्चित प्रतिशत मुनाफा आर्जन भएपछि नाफा सुरक्षित गर्नु स्वभिाविक नै हो । बैंक तथा वित्तीय संस्थाहरुको तेस्रो त्रैमासिक प्रतिवेदनमा नाफा राम्रै बढेकाले बजार केही दिनभित्र ब्याउन्स ब्याक हुने सम्भावना देखिन्छ । एक दुई दिन बजार घट्दैमा आफूसँग भएको शेयर बिक्री नगरी बरु घट्दो मूल्यमा आफ्नो लागत घटाउनतर्फ लगानीकर्ता लाग्नुपर्छ । ”

शेयर बजारमा छिटो छिटो मनस्थीति फेरिने मानिसले नाफा आर्जन गर्न नसक्ने बताउँदै बजारबाट नाफा कमाउन धैर्य रहनुपर्ने उनको बुझाई छ । यता मंगलबार थामिएको बजारमा बुधबार फेरि घटेपछि नयाँ लगानीकर्ताहरुमा भने बजार अझै घट्ने हो कि भन्ने चिन्ता थपिएको छ ।

बजार घटेसँगै शेयर लगानीकर्ताको सम्पत्ति माप बजार पूँजीकरणमा एकैदिन ४४ अर्ब ८७ करोड रुपैयाँले ह्रास आई ३६ खर्ब ४४ अर्ब ८२ करोड रुपैयाँमा संकुचित बनेको छ । मंगलबार ३६ खर्ब ८९ अर्ब ६९ करोड रुपैयाँ कुल बजार पूँजीकरण रहेको थियो ।

• म्यचुअल फण्ड बाहेक सबै समुहको सूचक ऋणात्मक

बुधबार कारोबारमा आएका म्यचुअल फण्ड बाहेक सबै समुहको सूचक ऋणात्मक भएपछि बजारमा उच्च अंकको गिरावट आएको हो । यसदिन विकास बैंक, वित्त, बैंकिङ्ग, उत्पादन, लगानी, निर्जीवन बीमाको सूचक १ प्रतिशतभन्दा धेरै घटेका छन् । ब्यापार, होटल तथा टुरिजम, अन्य, जीवन बीमाको सूचक १ प्रतिशतभन्दा कम घटेका छन् । म्युचअल फण्डको सूचक ०.१२ प्रतिशतले सकारात्मक बनेको छ ।

• निफ्राको सर्वाधिक कारोबार

यसदिन नेपाल इन्फ्रास्टक्चर डेभलपमेन्ट बैंकको २५ करोड ४५ लाख रुपैयाँको शेयर कारोबार भएको छ ।

हिमाल दोलखा हाइड्रोपावर २२ करोड ६ लाख नागरिक लगानी कोष १८ करोड ३७ लाख र मञ्जुश्री फाइनान्सको १६ करोड ७७ लाखको शेयर ख।रीद बिक्री भयो । अपि पावर, नबिल बैंक, एनआईसी एशिया बैंक, अपर तामाकोशी, एनआईसी एशिया बैंक र अरुण काबेली पावरको साढे ११ बढीको शेयर कारोबार भयो ।

• चार कम्पनीको शेयरमूल्यमा सकारात्मक सर्किट

ऋणात्मक बजारमा पनि ४ कम्पनीको शेययरमूल्यमा सकारात्मक सर्किट लागेको छ । बुधबारको बजारमा ज्योति लाइफ, महिला लघुवित्त, ग्रीन डेभलपमेन्ट बैंक र हिमाल दोलखा हाइड्रोपावरको शेयरमूल्यमा सर्किट लागेको हो ।

यसैगरी युनियन हाइड्रोपावर, जनउत्थान सामुदायिक लघुवित्त, अपि पावर, छ्याङ्दी हाइड्रोपावर, युनाइटेड मोदी र हिमालयन उर्जा विकास कम्पनीको शेयरमा लगानी गरेकाले पनि कमाएका छन् । दशौं ठूलो शेयरमूल्य बढेको हिमालयन उर्जा विकास कम्पनीको मूल्य २.७२ प्रतिशतले बढेको छ ।

• लिवर्टीका लगानीकर्ताले धेरै गुमाए

बुधबार लिवर्टी इनर्जीको शेयरमा लगानी गरेका लगानीकर्ताले धेरै गुमाएका छन् । कम्पनीको मूल्य ५.१७ प्रतिशत अर्थात १८ रुपैयाँ घटेर ३३० रुपैयाँमा झरेको हो ।

यस्तै हिमालयन पावर पार्टनर, नारायणी डेभलपमेन्ट बैंक, आइसिएफसी फाइनान्स, पाँचथर पावर, ग्लोबल आइएमई लघुवित्त, नेपाल हाइड्रो डेभलोपर, एनआरएन इन्फ्रास्टक्चर एण्ड डेभलपमेन्ट, गरिमा विकास बैंक र कामना सेवा विकास बैंकका लगानीकर्ताले पनि ३ प्रतिशत धेरैले गुमाएका छन् ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।