मानुषी लघुवित्तको आईपीओ २४ लाखले भरे, ८३ गुणा बढी शेयर माग

मानुषी लघुवित्त वित्तीय संस्थाको प्राथमिक शेयर (आईपीओ) मा आइतबारसम्म २४ लाखले आवेदन दिएका छन्।

लघुवित्तको बिक्री प्रबन्धक एसबिआई मर्चेण्ट बैंकिङ्ले दिएको जानकारी अनुसार आइतबारसम्ममा कम्पनीको आईपीओमा २४ लाख ३ हजार ५५ जनाले आवेदन गरेका छन् ।

उल्लेखित आवेदनबाट ३ अर्ब ६ करोड ३२ लाख ४३ हजार रुपैयाँ बराबरको ३ करोड ६ लाख ३२ हजार ४३० कित्ता शेयर खरिदको लागि आवेदन परेको हो । यो माग लघुवित्त कम्पनीले सर्वसाधारणमा बिक्रीमा ल्याएको शेयरको तुलनामा ८३.११ गुणा धेरै हो ।

धितोपत्र निष्काशन तथा बाँडफाँड निर्देशिका २०७४ बमोजिम लघुवित्तको आईपीओ ३६ हजार ८५६ जनाले १० कित्ताका दरले र ३ जनाले थप १ कित्ता सहित ११ कित्ताका दरले कुल ३६ हजार ८५९ जनाले मात्र पाउनेछन् । प्रारम्भिक आवेदनका आधारमा २३ लाख ६६ हजार १९६ जना आवेदकको हात खाली हुनेछ, जुन कुल आवेदकको ९८.४६ प्रतिशत हो ।  कुल आवेदकको १.५४ प्रतिशतले मात्र लघुवित्तको १० कित्ता शेयर गोलाप्रथाबाट हात पार्नेछन् । जसका लागि भाग्य निकै बलियो भएको हुनुपर्नेछ ।

लघुवित्तले साउन २७ गते बुधबारदेखि जारी पूँजीको ३६ प्रतिशतले हुन आउने ३ करोड ९३ लाख ७५ रुपैयाँ बराबरको ३ लाख ९३ हजार ७५० कित्ता शेयर निष्काशनमा ल्याएको हो। त्यसमध्ये ०.५ प्रतिशत आर्थत ५ हजार ४६९ कित्ता शेयर कर्मचारीहरुलाई र ५ प्रतिशत अर्थात १९ हजार ६८८ कित्ता शेयर सामुहिक लगानी कोषका लागि सुरक्षित गरी बाँकी ३ लाख ६८ हजार ५९३ कित्ता शेयरका लागि सर्वसाधारणबाट आवेदन माग गरिएको थियो ।

लघुवित्तको अधिकृत पूँजी एक २० करोड रुपैयाँ, जारी पूँजी १० करोड रुपैयाँ र चुक्ता पूँजी ७ करोड रुपैयाँ रहेको छ। सर्वसाधारणलाई ३ करोड ९३ लाख ७५ हजार रुपैयाँ बराबरको आईपीओ निष्काशनपछि लघुवित्तको चुक्ता पूँजी १० करोड ९३ लाख ७५ हजार रुपैयाँ पुग्नेछ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।