सेयर बजारमा चलखेलको नकारात्मक असर, उचाल्न खोज्दा झन् ठूलो पहिरो

नेपाल राष्ट्र बैंकका गभर्नर महाप्रसाद अधिकारी निलम्बन भएको प्रसङ्ग जोडेर सेयर बजारमा गरिएको चलखेलको प्रयास असफल हुँदा बजारमा झनै नकारात्मक असर देखिएको छ ।

गभर्नर निलम्बनको खबरहरु सार्वजनिक भएपछि सामाजिक सञ्जालहरुमा सेयर बजारले सकारात्मक लय लिने प्रकारका प्रचारबाजीहरु गरिएका थिए ।

गभर्नर अधिकारीले सेयर कर्जामा कडाई गर्नुका साथै ४ १२ को सीमा तोकिएका थिए । राष्ट्र बैंकको यो व्यवस्थाप्रति रुष्ट रहेका लगानीकर्ताले उनको निलम्बनपछि बजारमा उछाल आउने प्रचारबाजी गरेका थिए ।

बजारमा चलखेल गर्नेहरु सक्रिय हुँदा सोमबार बजार खुलेको पहिलो १० मिनेटमै नेप्से ४५ अंकले बढेको थियो । सोमबार प्रि ओपनिङ्ग सेसनमा नै नेप्से ७।४५ अंकले उक्लिएको थियो । नियमित सेसनको पहिलो १० मिनेटमै ४५ अंकले बढेको बजार त्यसपछि ओरालो लाग्न थाल्यो। बजार बन्द हुने समयसम्म आइपुग्दा आजको उच्च बिन्दुबाट ९० अंक तल झर्न पुग्यो । चलखेल गर्नेहरुले बजार खुल्नासाथ नेप्से ह्वात्तै उचालेर सेयर बिक्रीको क्रम बढाउन थाले जसको नाकारात्मक प्रभावले झनै ठूलो पहिरो गएको छ ।

सोमबार नेप्से ४४.६४ अंकले घटेर २४१९.७१ बिन्दुमा झरेको छ । कारोबारमा आउका अधिकांश कम्पनीको मूल्यमा गिरावट आएपछि नेप्से उच्च अंकले ऋणात्मक बनेको हो । ठूला कम्पनीको कारोबार मापक सूचक सेन्सेटिभ इन्डेक्स ९.३८ अंकले घटेर ४५४.३७ बिन्दुमा झरेको छ ।

यसदिन कारोबारमा आएका १९९ कम्पनीको सेयरमूल्य घट्यो भने ६ कम्पनीको सेयरमूल्य स्थीर रहँदा २८ कम्पनीको भाउ मात्र बढेको छ ।
सोमबार २३३ कम्पनीका ५० लाख ९५ हजार ८३४ कित्ता सेयर ४० हजार ५०९ संख्यामा खरीद बिक्री हुँदा कारोबार रकम २ अर्ब २६ करोड ७ लाख ८६ हजार ६२८ रुपैयाँमा समेटिएको छ । आज कारोबारमा आएका सबै उपसमुहगत सूचक ऋणात्मक बनेका छन् ।अन्यको सूचक सर्वाधिक ४.६२ प्रतिशतले घट्दा जीवन बीमा ३ तथा ब्यापार, होटल, जलविद्युत, फाइनान्स, उत्पादन र लगानी सूचक पनि २ प्रतिशत अधिक घटेका छन् ।

आजको कारोबारमा नेष्डो समृद्ध लघुवित्तको सेयरमूल्य १० प्रतिशतले बढ्दा जाल्पा सामुदायिक लघुवित्तको सेयरमूल्य पनि ९.९९ प्रतिशतले बढेको छ । नेष्डो समृद्ध लघुवित्तको अन्तिम पटक १८७० रुपैयाँ र जाल्पाको ४९१.१० रुपैयाँमा अन्तिम पटक कारोबार भएको छ ।

यसैगरी उता इमर्जिङ्ग नेपाल लिमिटेड र राष्ट्र उत्थान लघुवित्तको सेयरमूल्यमा नकारात्मक सर्किट लागेको छ । इमर्जिङ्ग नेपालको सेयरमूल्य ९.९८ प्रतिशत घटेर १००१ रुपैयाँमा झर्दा राष्ट्र उत्थानको १३८०.१० रुपैयाँमा झरेको छ ।

आज नेपाल लाइफको सेयरमूल्य घटेर उच्च कारोबार भएको छ । कम्पनीको सेयरमूल्य प्रतिकित्ता ९४० रुपैयाँसम्म झरेकाले लगानीकर्ताको आकर्षण बढ्दा १६ करोड ५२ लाख रुपैयाँको सेयर कारोबारमा आएको छ । यसैगरी निफ्रा ७.२१ करोड, नबिल बै.क ६.९२ करोड, एनआईसी एशिया बैंक ६.८६ करोड, हिमालयन डिष्टिलरी ६.७८ करोड र सूर्या लाइफको ६.७८ करोडको सेयर कारोबार भएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।