राप्ती हाइड्रोले स्थानीयका लागि जेठ २४ गतेदेखि आईपीओ जारी गर्ने

राप्ती हाइड्रो एण्ड जनरल कन्स्ट्रक्सन लिमिटेडले आयोजना प्रभावित क्षेत्रका वासिन्दाहरुका लागि जेठ २४ गतेदेखि प्रारम्भिक सार्वजनिक निष्काशन (आईपीओ) बिक्री खुला गर्ने भएको छ ।

कम्पनीले आयोजना प्रभावित क्षेत्र रुकुम पूर्वी जिल्ला र रुकुम पश्चिम जिल्लाका स्थानीय बासिन्दाहरुका लागि पहिलो चरणमा प्रतिसेयर १०० अंकित मूल्यका ६ लाख १२ हजार ७९३ कित्ता सेयर बिक्री खुला गर्न लागेको हो ।

कम्पनीले निष्काशन गर्न लागेको उक्त साधारण सेयरमा स्थानीयले असार ७ गतेसम्म आवेदन दिन सक्नेछन् । सो अवधिमा बिक्री खुला गरिउको सबै सेयर बिक्री नभएको खण्डमा भने ढिलोमा असार २२ गतेसम्म सेयर खुला नै रहने धितोपत्र निष्काशन तथा बिक्री प्रबन्धक सिद्धार्थ क्यापिटल लिमिटेडले जनाएको छ ।

न्यूनतम १० कित्ता देखि अधिकतममा ६ लाख कित्ताका लागि आवेदन दिन सकिनेछ ।

तोकिएको क्षेत्रका स्थानीय बासिन्दाले आईपीओमा नेपाल धितोपत्र बोर्डबाट स्वीकृति प्राप्त गरेका सम्पूर्ण सी–आस्वा सदस्य बैंक तथा वित्तीय संस्था र तिनका शाखा कार्यालयबाट समेत आवेदन दिन सकिने उल्लेख छ । यस्तै सिद्धार्थ बैंकको पुथा उत्तरगंगा र मुसिकोट शाखा कार्यालय, ग्लोबल आइएमई बैंकको छिप्रीदह र मुसिकोट शाखा कार्यालय र प्रभु बैंकको मुसिकोट शाखा कार्यालयबाट आवेदन दिन सकिनेछ ।

कम्पनीले आईपीओ निष्काशनका लागि गराएको रेटिङ्गमा कम्पनीलाई इक्रा नेपालले ‘इक्रा एनपी आईआर सिंगल बी प्लस’ रेटिङ्ग प्रदान गरेको छ । यो रेटिङ्ग प्राप्त संस्थाहरुमा दायित्व बहन गर्ने क्षमतामा उच्च जोखिम रहेको संकेत गर्दछ ।

राप्ती हाइड्रोले सेबोनबाट जेठ १० गते मंगलबार अंकित मूल्य १०० रुपैयाँ २९ करोड ४१ लाख रुपैयाँ बराबरको २९ लाख ४१ हजार ४१० कित्ता आइपीओ जारी गर्न अनुमति प्राप्त गरेको थियो । राप्ती हाइड्रोले जारी पूँजीको ४८ प्रतिशत सेयर सर्वसाधारणमा बिक्री गर्न लागेको हो ।

कम्पनीको जारी पूँजी ६१ करोड २७ लाख ६६ हजार ८०० रुपैयाँ रहेको छ । जसमध्ये संस्थापक सेयरधनीबाट ३१ करोड ८६ लाख २५ हजार ८०० रुपैयाँ चुक्ता भैसकेको छ । २९ करोड ४१ लाख ४१ हजार रुपैयाँको आईपीओ बिक्रीपछि कम्पनीको चुक्ता पूँजी ६१ करोड २७ लाख ६६ हजार ८०० रुपैयाँ पुग्नेछ ।

कम्पनीले रुकुममा ५ मेगावाटको रुकुम गाड हाइड्रोपावर आयोजना निर्माण गरिरहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।