गभर्नर बन्ने दाउसहित नबिलका सिइओ ढुंगानाले दिए राजीनामा, नयाँ सिइओ शाक्य कि ज्ञवाली ?

काठमाडौँ । नेपाल राष्ट्र बैंकको गभर्नर नियुक्तिका लागि सिफारिस प्रक्रिया सुरु भएसँगै नबिल बैंकका प्रमुख कार्यकारी अधिकृत (सिइओ) ज्ञानेन्द्र ढुंगानाले राजीनामा दिएका छन् ।

उनले आइतबारदेखि लागू हुने गरी भन्दै सोमबार राजीनामा बुझाएका हुन् । नेपाल बंगलादेश बैंक गाभिएसँगै सिइओ भएका ढुंगाना गत १७ असारमा पुनः २ वर्षका लागि सिइओ नियुक्त भएका थिए ।

नेपाल बंगलादेश बैंकलाई नबिलमा गाभ्न महत्वपूर्ण भूमिका खेलेका ढुंगाना गर्भनरको दौडमा छन् । उद्योगपति विनोद चौधरीका एकदम निकट मानिने उनी गर्भनर कांग्रेसको भागमा परेको अवस्थामा बलिया दाबेदार भएको बताइन्छ ।

को बन्छ नबिलको नयाँ सिइओ ?

ज्ञानेन्द्र ढुंगानाले राजीनामा दिएपछि नबिल बैंकमा अब सिइओ को बन्छ भन्ने चासो र चर्चा सुरु भएको छ । यद्यपि उनको राजीनामा स्वीकृत भइनसकेकाले सञ्चालक समितिले राजीनामा स्वीकृत गरेको अवस्थामा नयाँ सिइओ नियुक्त गर्ने बाटो खुल्नेछ ।

नबिल बैंक स्रोतका अनुसार हाल कार्यरतबाटै नयाँ सिइओ बनाउने सम्भावना बलियो छ । त्यसका लागि मुख्य दाबेदारका रूपमा डेपुटी सिइओद्वय सुजित शाक्य र मनोज ज्ञवाली छन् ।

यसअघि हिमालयन बैंक, लक्ष्मी बैंक, बैंक अफ एसिया, एनआइसी एसिया, सिभिल, जनता बैंक, ग्लोबल आइएमई लगायत बैंकमा कुशलतापूर्वक काम गरेको अनुभव भएका शाक्यलाई पहिलो दाबेदारका रूपमा हेरिएको छ ।

यस्तै, डेपुटी सिइओकै रूपमा कार्यरत ज्ञवाली पनि सफल बैंकरमा गनिन्छन् । ज्योति विकास बैंकको सिइओ छाडेर नायब महाप्रबन्धकका रूपमा नबिल बैंक प्रवेश गरेका उनी ४ वर्षको बीचमै महाप्रबन्धक, डेपुटी सिइओ हुँदै वरिष्ठ डेपुटी सिइआ बनिसकेका छन्

छोटो अवधिमै आकर्षक बढुवामा पर्दै गएका ज्ञवाली नयाँ सिइओ बन्ने सम्भावना पनि उत्तिकै छ । तर, नयाँ सिइओको नियुक्ति मुख्य लगानीकर्ता विनोद चौधरीको ‘इन्ट्रेस्ट’ र सञ्चालक समितिले गर्ने निर्णयमा भर पर्ने भएकाले यसै भन्न सकिने अवस्था नरहेको बताइएको छ ।