सर्लाही । जिल्ला भन्सार कार्यालयले चालु आर्थिक वर्षको चैतसम्म ४१ करोड बढी राजस्व संकलन गरेको छ । आर्थिक वर्ष २०८१/८२ को चैतसम्म कुल ४१ करोड ७४ लाख ३३ हजार ४३३ रुपैयाँ राजस्व संकलन भएको प्रमुख भन्सार अधिकृत ठाकुर आचार्यले जानकारी दिए । यस आर्थिक वर्षको ९ महिनामा ४ महिनामात्र भन्सार कार्यालयले लक्ष्यअनुसार राजस्व संकलन गरेको छ । ५ महिना लक्ष्यभन्दा कम राजस्व संकलन भएको उनले बताए ।
भन्सारबाट हाल संकलन भएको राजस्व लक्ष्यको ९५.०४ प्रतिशत मात्र हो । आर्थिक वर्षको सुरु महिना साउनमा लक्ष्यको १११.०८ प्रतिशत अर्थात् ४ करोड ९४ लाख ४१ हजार ५५५ रुपैयाँ संकलन भएको थियो । दोस्रो महिना भदौमा लक्ष्यको अत्यधिक कम ४३.७१ प्रतिशत अर्थात् २ करोड १३ लाख ७५ हजार ६३८ रुपैयाँ मात्र राजस्व संकलन भएको तथ्यांकमा उल्लेख छ ।
यस्तै असोजमा लक्ष्यको ६७.२२ प्रतिशत अर्थात् २ करोड ८० लाख ५३ हजार ८४५ रुपैयाँ राजस्व संकलन भएको छभने कात्तिकमा ९०.९३ प्रतिशत ४ करोड १८ लाख १७ हजार ६३१ रुपैयाँ, मङ्सिरमा १२४.३१ प्रतिशत ६ करोड ७२ लाख ४९ हजार २९४ रुपैयाँ, पुसमा अहिलेसम्मकै धेरै १२७.३७ प्रतिशत अर्थात् ६ करोड ७९ लाख ९ हजार ६०१ रुपैयाँ संकलन भएको कार्यालयले जनाएको छ ।
कार्यालयको तथ्यांकअनुसार माघमा लक्ष्यको ११७.७५ प्रतिशत अर्थात् ५ करोड ९३ लाख ४६ हजार ८२८ रुपैयाँ, फागुनमा ९२.५८ प्रतिशत अर्थात् ४ करोड ९३ लाख २९ हजार रुपैयाँ र चैतमा लक्ष्यको ७१.७८ प्रतिशत अर्थात् ३ करोड ६५ लाख ७१ हजार ५१० रुपैयाँ राजस्व संकलन भएको कार्यालयका सूचना अधिकारी एवं भन्सार अधिकृत डम्बरबहादुर बस्नेतले जानकारी दिए । यस वर्ष तरकारी आयात गत वर्षको भन्दा कम भएकाले राजस्व संकलन लक्ष्यअनुसार हुन नसकेको उनले बताए ।
यस भन्सार कार्यालयबाट प्लाइ निर्यात हुने गरेको छभने प्लाइ उद्योगका लागि आवश्यक सामग्री, थोरै मात्रामा धान, तरकारीलगायत सामान आयात हुँदै आएको छ ।
प्रतिक्रिया