चालु आर्थिक वर्षको आय–व्यय अनुमान दोस्रो पटक संशोधन


काठमाडौँ । चालु आर्थिक वर्ष २०८१/८२ को वार्षिक आय र व्ययको अनुमान सरकारले दोस्रोपटक संशोधन गरेको छ ।

गत माघमा बजेटको अर्धवार्षिक समीक्षामार्फत् आय र व्ययको अनुमान संशोधन गरेको सरकारले अहिले फेरि संशोधन गरेको हो ।

उपप्रधानमन्त्री तथा अर्थमन्त्री विष्णुप्रसाद पौडेलले आज सङ्घीय संसद्को संयुक्त बैठकमा आगामी आर्थिक वर्ष २०८२/८३ को बजेट वक्तव्य प्रस्तुत गर्नुहँुदै चालु आर्थिक वर्षको सरकारको आय र व्यय संशोधन गरिएको बताए ।

अर्थमन्त्री पौडेलका अनुसार चालु आर्थिक वर्षका लागि सरकारले  १८ खर्ब ६० अर्ब ३० करोड रुपैयाँ बराबरको बजेट ल्याएकोमा यसवर्ष वार्षिक विनियोजनको ८९.४ प्रतिशत अर्थात् १६ खर्ब ६२ अर्ब ३७ करोड पुग्ने संशोधित अनुमान गरिएको छ ।

चालु खर्चतर्फ विनियोजनको ८८.५ प्रतिशत, पुँजीगत खर्च विनियोजनको ८४.४ प्रतिशत र वित्तीय व्यवस्थापनतर्फ विनियोजनको ९७.६ प्रतिशत रहने संशोधन गरिएको अर्थमन्त्री पौडेलले बताए । सरकारले चालु आर्थिक वर्षका लागि चालु शीर्षकमा  ११ खर्ब ४० अर्ब ६६ करोड रुपैयाँ , पुँजीगततर्फ ३ खर्ब ५२ अर्ब ३५ करोड रुपैयाँ र वित्तीय व्यवस्थातर्फ ३खर्ब ६७ अर्ब २८ करोड रुपैयाँ बराबर विनियोजन गरेको थियो ।

अर्थमन्त्री पौडेलका अनुसार चालु आर्थिक वर्ष राजस्व परिचालन १२ खर्ब ६७ अर्ब ३९ रुपैयाँ करोड पुग्ने अनुमान गरिएको छ । यसवर्ष रू १४ खर्ब १९ अर्ब ३० रुपैयाँ करोड बराबर राजस्व उठाउने सरकारको लक्ष्य थियो ।

त्यसैगरी वैदेशिक अनुदान र ऋण प्राप्ति पनि घट्न देखिएको छ । चालु आवका लागि  ५२ अर्ब ३२ करोड ६५ लाख रुपैयाँ बराबर वैदेशिक अनुदान उठाउने सरकारको लक्ष्य रहेकोमा अहिले त्यसलाई संशोधन गरेर ३४ अर्ब ८९ करोड रुपैयाँ बराबर मात्रै वैदेशिक सहायता अनुदान उपलब्ध हुने अनुमान गरिएको अर्थमन्त्री पौडेलले बताए ।

चालु आर्थिक वर्षका लागि वैदेशिक ऋण १ खर्ब ६९ अर्ब ६० रुपैयाँ करोड बराबर परिचालन गरिने संशोधित अनुमान गरिएको छ ।

प्रकाशित मिति: १५ जेठ २०८२, बिहीबार  १६ : २५ बजे

समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।