साधारण सभाको साढे ६ महिना बित्दा पनि पाएनन् साना किसान लघुवित्तका शेयरधनीले बोनस

नेपाल स्टक एक्सचेञ्जमा सूचीकृत कम्पनीहरुले आफ्ना लगानीकर्तालाई प्राथमिकतामा नराख्दा लगानीकर्ताले दुःख पाउँदै आएका छन्।

एकाध कम्पनीले भने साधारण सभा बित्न नपाउँदै बोनस तथा नगद लाभांश लगानीकर्ताको खातामा पठाउने गरेका छन् । तर अझै पनि अधिकांश कम्पनीहरुले बोनस शेयर तथा नगद लाभांश लगानीकर्ताको खातामा पठाउन ढिलासुस्ती गर्दै आएका छन् ।

साना किसान विकास लघुवित्तले आर्थिक वर्ष २०७५/७६ को लाभांश अझै लगानीकर्ताको खातामा पठाउन सकेको छैन। लघुवित्तले गत पुस २६ गते नै साधारण सभा सम्पन्न गरेको भए पनि ७ महिना बित्न लाग्दासम्म लगानीकर्ताले बोनस शेयर पाएका छैनन् । जसका कारण चाहेर पनि कतिपय शेयरधनीले बढेको बजारमा लघुवित्तको शेयर बिक्री गर्न सकेनन् ।

अर्को नजरबाट हेर्ने हो भने समयमा लघुवित्तको शेयर सूचीकरण भैसकेको अवस्थामा शेयरको तरलता बढ्न गई अहिले देखिएको अधिक उतार-चढावको अवस्था पनि नआउन सक्थ्यो।

साधारण सभा भएको महिनौंसम्म पनि लगानीकर्ताको खातामा लाभांश पठाउन नसक्नुमा कम्पनीको लापरवाही धेरै भएको नेपाल इनभेष्टर्स फोरमका निवर्तमान अध्यक्ष अम्बिकाप्रसाद पौडेल बताउँछन् । ‘कम्पनीले लगानीकर्ताको मर्म र भावना नबुझेको तथ्यलाई सबैले मनन गर्नुपर्छ । कम्पनीको समग्र सूचाङ्कमध्ये संस्थागत सूचाङ्क कमजोर भएको अवस्थालाई सबै लगानीकर्ताले ध्यानमा राख्नुपर्छ । साथै कम्पनी सचिव र प्रमुख कार्यकारी अधिकृतका बीचमा आपसी तालमेल हुन नसकेका कारण यस्ता घटना घटिरहेका छन् । कम्पनी सञ्चालक समितिले पनि पूँजी बजारको मर्मलाई बुझ्न नसकेको कम्पनीहरुले नै महिनौं बित्दा समेत लाभांश लगानीकर्तालाई दिन सक्दैनन्’ पौडेलले भने ।

लघुवित्तले आर्थिक वर्ष २०७५/७६ को कमाईबाट लगानीकर्तालाई २७.२५ प्रतिशत बोनस र कर प्रयोजनका लागि १.४३ प्रतिशत नगद लाभांश वितरण गर्ने प्रस्ताव गरेको थियो । उक्त प्रस्ताव २०७६ को पुस २६ गते नै साधारण सभाबाट अनुमोदन भईसके पनि २०७७ को मध्य साउनमा आईपुग्दा पनि लगानीकर्ताको खातामा बोनस शेयर पठाइएको छैन ।

यस सम्बन्धमा लघुवित्तको शेयर निष्काशन तथा बिक्री प्रबन्धक नबिल इन्भेष्टमेण्टले केही दिनमा लगानीकर्ताको खातामा बोनस जम्मा गरिने बताएको छ ।
उता साना किसान लघुवित्तका उपप्रमुख कार्यकारी अधिकृत झलेन्द्र भट्टराईले प्रकृयागत ढिलासुस्तीका कारण शेयर लगानीकर्ताको खातामा पठाउन ढिलाई भएको बताए । साउन ८ गते बिहीबार नेपाल स्टक एक्सचेञ्जमा लघुवित्तको शेयर सूचीकरण गराई सकेको बताएका भट्टराईले केही दिनभित्रमा नै लगानीकर्ताको खातामा बोनस जम्मा हुने नोटबजारसँग बताए ।

लकडाउनका कारण पनि बोनस सूचीकरणमा केही ढिलाई भएको उनको भनाई छ । ‘नेप्सेमा शेयर सूचीकरण भैसकेको छ । सिडिएससीतर्फ केही काम बाँकी छ, त्यो पूरा हुनासाथ लगानीकर्ताको खातामा शेयर जम्मा हुन्छ’ भट्टराईले भने ।

लघुवित्तले गत आर्थिक वर्षको साधारण सभा बोलाउने समय हुन लागिसकेको छ । चालु आर्थिक वर्ष सुरु भएको दुई साता बित्न लागि सकेको अवस्थामा लघुवित्तका शेयरधनीले २ वर्ष पहिलेको बोनस पाउन नसकेका हुन् ।

यस सम्बन्धमा नेप्सेले चुस्त रुपमा कम्पनीले काम नगर्दा शेयर सूचीकरणमा ढिलाई भएको बताएको छ । नेप्सेका प्रवक्ता मुराहरी पराजुली भन्छन् ‘अहिले धेरै जसो कम्पनीहरुले आफ्ना लगानीकर्ताको चाहनालाई ध्यानमा राखेर शेयर बजार सम्बन्धि कामहरु निर्धारित समयमा गर्दै आएका छन् । तर अझै पनि धेरै कम्पनीहरुले यो कामलाई प्राथमिकतामा राखेका छैनन् । साना किसान लघुवित्तको हकमा पनि त्यस्तो देखियो । नेप्से र सिडिएससीको काम एकसाथ गरेको भए सायद आज लगानीकर्ताको खातामा शेयर जम्मा हुन्थ्यो ।’

गत पुस मसान्तदेखि नै लघुवित्तले चुक्ता पूँजी १ अर्ब २ करोड रुपैयाँ रहेको वित्तीय विवरण सार्वजनिक गर्दै आईरहेको छ । तर लघुवित्तको शेयर संख्या भने अघिल्लो आर्थिक वर्षको चुक्ता पूँजी ७८ करोड ६० लाख रुपैयाँ बराबरको ७८ लाख ६० हजार कित्ता शेयर मात्र सूचीकरण भैरहेको छ।