गत असार २२ गते औपचारिक रुपमा मर्जर पूरा गरी एकीकृत कारोबार सुरु गरेको आरम्भ चौतारी लघुवित्तको शेयर नेपाल स्टक एक्सेन्ज (नेप्से) मा सूचीकरण भएको छ । साविकको चौतारी लघुवित्त र आरम्भ लघुवित्त एकआपसमा मर्ज भएर नयाँ संस्थाका रुपमा आरम्भ चौतारी लघुवित्त बनेको हो ।
नयाँ संस्थाको चुक्ता पूँजी २६ करोड ३४ लाख ४८ हजार रुपैयाँ पुगेको छ । अंकित मूल्य १०० रुपैयाँका आधारमा उक्त चुक्ता पूँजीबाट २६ लाख ३४ हजार ४८० कित्ता शेयरहरु दोस्रो बजारमा कारोबारका लागि सूचीकरण गरिएको हो ।
साविकका चौतारी र आरम्भ एक बराबर एकको शेयर आदान प्रदान हुने गरी एकआपसमा मर्जरमा गएका थिए । मर्जर पूरा भएपछि बनेको आरम्भ चौतारी लघुवित्तलाई नेप्सेले ACLBSL कारोबार संकेत दिएको छ ।
योसँगै साविकको चौतारी र आरम्भ लघुवित्तका शेयरधनीको हितग्राही खातामा पहिले मौज्दात रहेको शेयर संख्यामा कारोबार संकेत परिवर्तन भई शेयर जम्मा हुनेछ ।
मर्जरपछि बनेको नयाँ लघुवित्तको जगेडा कोषमा ७ करोड ६० लाख ६५ हजार रुपैयाँ सञ्चित भएको छ ।
८५ करोड ७३ लाख १५ हजार रुपैयाँ निक्षप संकलन गरी २ अर्ब ५० करोड ८० लाख ७४ हजार रुपैयाँ कर्जा प्रवाह गरेको आरम्भ चौतारीको गत असार २१ गतेसम्मको खुद नाफा ३ करोड ८१ लाख ९७ हजार रुपैयाँ कायम भएको छ ।
मर्जरपछि लघुवित्तको ७७ शाखा तथा ३९१ कर्मचारी कायम भएका छन् । मर्जरपछि सदस्य संख्या ६२ हजार २०२ र ऋणीको संख्या ३३ हजार ६४ पुगेको बताइएको छ ।
यी दुई संस्थाले २०७६ साल जेठ २२ गते मर्जर जाने सहमति गरेका थिए । नेपाल राष्ट्र बैंकबाट गत फागुन १८ गते स्वीकृति पाएका थिए भने कम्पनी रजिष्ट्रारको कार्यालयबाट असार १ गते स्वीकृति लिएका थिए । गत पुस ९ गते दुवै कम्पनीको साधारण सभाले मर्जर सम्वन्धि प्रस्ताव पारित गरेका थिए ।
समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।
About Us
प्रतिक्रिया