नेप्सेको ‘क्लोजिङ प्राइस’ ‘वेटेड एभरेज’ मा नभई न्युनतम मूल्यमा अन्तिम मूल्य गणना नहुँदा सबै सूचक बिग्रियो, बढेको बजार यसरी घट्यो

नेपाल स्टक एक्स्चेञ्ज लिमिटेड (नेप्से) ले हालै सुरु गरेको अन्तिम मूल्य गणना विधिमा त्रुटी आउँदा सोमबार सेयर बजारका सबै इण्डेक्सहरु अवास्तविक भएका छन् । नेप्सेले कारोबारको अन्तिम १५ मिनेट अवधिको कारोबारको भारित औषतका आधारमा अन्तिम सेयर मूल्य गणना गर्न थालेको थियो । तर सोमबार उक्त गणना विधि भारित औषतमा नभई १५ मिनेटको न्युनतम मूल्यका आधारमा गणना गर्दा बढेको बजार घटेको देखिएको हो ।

नेप्से बन्द भएको केही समयसम्म अन्तिम पटकको सेयर मूल्यका आधारमा बजार १२ अंकभन्दा बढीले उकालो लागेको देखाएको नेप्सेको वेबसाइटमा १५ मिनेटको औसत गणना पश्चात २.०७ अंकले बजार घटेको देखिएको थियो । नोटबजारले विभिन्न कम्पनीहरुको अन्तिम १५ मिनेटको कारोबारको तथ्यांकलाई रुजु गर्दा सोमबार अन्तिम १५ मिनेटको भारित औसत नभई न्युनतम मूल्यलाई अन्तिम मूल्य कायम गर्दा बजार घटेको देखिएको हो ।

सोमबार अधिक कारोबारमा आएका तथा सेयर मूल्यमा उतारचढाव देखिएका कम्पनीहरुको बजार बन्द हुने बेलाको १५ मिनेट अवधिको सेयर मूल्यको भारित औसत अनुसार अन्तिम मूल्य कायम नभएको देखिएको हो । १५ मिनेट अवधिको न्यनतम सेयर मूल्यलाई अन्तिम मूल्य कायम गरिँदा कम्पनीहरुको सेयरको अन्तिम मूल्य धेरै घटेको र त्यसको सिधा असर नेप्से इण्डेक्समा परेको देखिएको हो ।
नेप्सेले यस सम्बन्धमा वेबसाइटमा अध्ययन भइरहेको सूचना सार्वजनिक गरेको छ ।

यो सामग्री तयार गर्दासम्ममा नेप्सेले अनलाइन कारोबार प्रणालीमा कम्पनीहरुको अन्तिम सेयर मूल्य गणनामा भएको त्रुटी सच्याउने क्रममा अनलाइन कारोबार प्रणाली टीएमएसमा बजार बढेको देखिएको छ । अहिले नेप्सेको वेबसाइटमा बजार २.०७ अंकले घटेको देखिएको छ भने टीएमएसमा नेप्से २.६१ अंकले बढेको देखिएको छ ।

नेप्सेमा सूचीकृत कम्पनीहरुको अन्तिम सेयर मूल्यका आधारमा समग्र उपसमुह तथा नेप्से इण्डेक्सको गणना हुने गरेको छ । कम्पनीहरुको अन्तिम सेयर मूल्य गणना विधिमा फरक परेपछि सोमबार कम्पनीहरुको सेयर मूल्य पनि गलत देखिएको छ भने समग्र इण्डेक्स समेत तल झरेको देखिएको हो । भारित औसतमा अन्तिम सेयर मूल्य गणना भएको अवस्थामा कम्पनीहरुको सेयर मूल्य धेरै तल नआउँदा नेप्से इण्डेक्स पनि तल झर्ने अवस्था बन्ने थिएन ।

इण्डेक्सको गणनामा त्रुटी भएको भन्दै चौतर्फी आवाज उठेपछि नेप्सेले त्यसमा अध्ययन भइरहेको सूचना सार्वजनिक गरेको थियो । नेप्सेका अनुसार सोमबार भएका १ लाख ७० हजार ७२६ पटक भएको सेयर कारोबारको विबरण रुजु गरेर कम्पनीहरुको अन्तिम १५ मिनेटको सेयर कारोबारको भारित औसतका आधारमा अन्तिम मूल्य कायम गर्ने काम भइरहेको छ ।