काेसी प्रदेशको सुनसरीमा भारी वर्षा, सतर्कता अपनाउन आग्रह

सुनसरी । सुनसरीको तरहरासहित आसपासका क्षेत्रमा बुधबार दिउँसाे भारी वर्षा भएकाे छ ।

जल तथा मौसम विज्ञान विभागका अनुसार बुधबार बिहानदेखि नै कोसी प्रदेशका केही ठाउँमा भारी वर्षा भइरहेको हो।

पछिल्लो ३ घन्टामा सुनसरीको तरहरा र आसपासका क्षेत्रमा भारी वर्षा भएको मापन गरिएको छ।

पछिल्लो ३ घन्टामा तरहरा क्षेत्रमा ७२.७ मिलिमिटर र मोरङको केराबारी क्षेत्रमा ५२.४ मिलिमिटर वर्षा भएको धरानस्थित मौसम पूर्वानुमान शाखा प्रमुख रुद्रबहादुर परियारले जानकारी दिए।

‍उनका अनुसार अहिले पनि सुनसरीको धरान, तरहरा, इटहरीलगायत पूर्वी क्षेत्रमा मध्यम वर्षा भइरहेको छ।

आज र भोलि सुनसरीसहित पूर्वी क्षेत्रमा मध्यमदेखि भारि वर्षाको सम्भावना रहेकाले नदी तटीय क्षेत्रका स्थानीयलाई आवश्यक सर्तकता अपनाउन अनुरोध गरिएको प्रमुख परियारले बताए।

विभागले भारी वर्षाका कारण विभिन्न खोलामा आकस्मिक बाढीको सम्भावना रहेको भन्दै सतर्कता अपनाउन आग्रह गरेको छ।

धरानको सर्दु, खर्दु, सुनसरी खोला, इटहरीको बूढी खोला, खेसलियालगायत स–साना खोलानालामा आकस्मिक बाढी आउन सक्ने, होचो भू–भागमा डुबानको जोखिम रहेकाले सतर्कता अपनाउन विभागले आग्रह गरेको हो।