सामाजिक सुरक्षा कोषमा आबद्धता बढाउन सरकारले ठोस र विशेष योजना ल्याउनुपर्छ : अध्यक्ष डा बद्री केसी

 गैरआवासीय नेपाली संघका अध्यक्ष डा बद्री केसीले सरकारले कुनै ठोस योजना र कार्यक्रम ल्याउन नसक्दा वैदेशिक रोजगारीमा रहेका र विदेशमा अनौपचारिक क्षेत्रमा रहेको ठूलो सङ्ख्या अझै पनि सामाजिक सुरक्षा कोषको दायरा भन्दा बाहिर रहेको बताए ।  सामाजिक सुरक्षा कोषले  सातौँ सामाजिक सुरक्षा दिवसको अवसरमा  आयोजना गरेको कार्यक्रम शुभकामना मन्तव्य राख्दै अध्यक्ष डा केसीले सामाजिक सुरक्षा कोषको दायरामा ल्याउन सरकारले ठोस योजना  र अभिभुखिकरण कार्यक्रम गर्नुभन्दा पनि औपचारिकता र विदेश जानुपूर्व अनिवार्य प्रक्रियाको रुपमा मात्रै  सञ्चालन गर्दा विदेशमा रहेका श्रमिकहरूले महत्व नै बुझन नसकेको बताएका हुन । 

उनले भने, ‘आजभन्दा तीन वर्षअघि नै गैरआवासीय नेपाली संघ र सामाजिक सुरक्षा कोषले मिलेर बढी भन्दा बढी श्रमिक र विदेशमा अनौपचारिक क्षेत्रमा रहेकाहरूलाई यस कोषमा समेट्ने  सहमति नै गर्दा पनि आजसम्म एउटा पनि काम गर्न सकिएको छैन । विदेशमा जानुपूर्व पैसा तिरेर अनिवार्य गर्नैपर्ने प्रक्रियाको रुपमा मात्रै सञ्चालन भइरहेको छ त्यसैले त ५० लाख बढी बाह्य श्रम बजारमा हुँदा पनि १२ लाख मात्रै यस कोषमा आबद्ध  भएका छन् ।”

अझ दुखको कुरा जति नेपालबाट जाँदा आबद्ध भएका थिए ति सबैले कोषमा निरन्तर योगदान गरेका छैनन् रिन्यु गर्नेको संख्या निकै कम रहेको उनको भनाइ छ ।  कोष स्थापना गर्नु ठूलो कुरा होइन यस्ता कोषको प्रभावकारी कार्यान्वयन हुनु जरुरी रहेको बताउँदै उनले श्रमिकलाई यसका फाइदाबारे बुझाउन जरुरी छ ।”

सामाजिक सुरक्षा कोषमा आबद्ध गराउने मात्रै नभई कोषमा निरन्तर रुपमा टिकाइराख्न सरकारले विशेष योजना बनाउनुपर्नेमा अध्यक्ष डा केसीले जोड दिए । उनले कोषमा जम्मा भएको रकम नेपालको विकासका लागि  लगानी गर्न सक्नुपर्नेमा सरकारको ध्यानाकर्षण गराए ।

विदेशमा रहेका नेपाली श्रमिकलाई यस कोषमा आबद्ध हुँदाका फाइदाबारे जानकारी गराउनुपर्नेमा जोड दिँदै उनले श्रमिकलाई नबुझाई यस कोषमा आबद्धता बढाउन नसकिने धारणा व्यक्त गरे ।