प्रविधिको प्रयोगले शेयर लगानीकर्ता बढ्दै, अनलाइन प्रयोगकर्ता साढे ६४ हजार

नेपालको शेयर बजारमा प्रविधिको प्रयोग बढ्न थालेपछि अनलाइन प्रयोगकर्तासँगै सक्रिय लगानीकर्ताहरुको संख्या निरन्तर बढ्न थालेको छ ।

पछिल्लो दुई सातामा धितोपत्रको दोस्रो बजारमा १२ हजार ७५३ सक्रिय लगानीकर्ता थपिदा अनलाइन लिनेहरुको संख्या ७ हजार ४६० ले बढेको छ । योसँगै शेयर बजारमा सक्रिय लगानीकर्ताको संख्या भदौ ११ गते विहीबारसम्म २ लाख ८७ हजार ८५४ पुगेको छ भने अनलाइन प्रयोगकर्ताको संख्या ६४ हजार ६१६ पुगेको छ ।

पछिल्लो चरणमा प्राथमिक बजारमा साढे ५ लाख बढी लगानीकर्ताहरुले शेयर आवेदन गर्ने गरेको पाइएको छ । रिलयान्स लाइफको आईपीओमा हालसम्मकै सबैभन्दा बढी ५ लाख ८९ हजार ४६४ लगानीकर्ताले आवेदन गरेका छन् ।

लकडाउन पछि नियामक निकायले अनलाइन कारोबारलाई प्रोत्साहन गर्न थालेपछि दोस्रो बजारमा अनलाइन मार्फत कारोबार गर्ने लगानीकर्ताको संख्या समेत निरन्तर बढ्न थालेको हो । धितोपत्र बोर्डले नयाँ आर्थिक वर्ष सुरुभएयता अनलाइन शेयर कारोबारलाई जोड दिँदै आएको छ ।

बोर्डले लगानीकर्ताहरूले शेयर खाताको शेयर ट्रान्सफर र रकम ट्रान्सफर गर्दा विद्युतीय माध्यमको प्रयोग गर्न प्रोत्साहित गरेपछि अनलाइन लिनेहरुको संख्या ह्वात्तै बढेको हो । नेपाल स्टक एक्सचेन्जका अनुसार साउन लागेयता मात्रै ३२ हजार बढी अनलाइन प्रयोगकर्ता थपिएका छन् ।

गत असार २८ गतेसम्म कुल ३१ हजार ९८८ जना शेयर लगानीकर्ताले अनलाइन कारोबारका लागि युजर पासवर्ड लिएकोमा त्यो संख्या बढेर भदौ गतेसम्म ६४ हजार ६१६ पुगेको छ । साउन लागेयता नै अनलाइन प्रयोगकर्ताको संख्या दोब्बर पुगको पुगेको छ ।

सिडिएस एण्ड क्लियरिङ लिमिटेडका अनुसार हालसम्म १८ लाख ४८ हजार ३५९ डिम्याट खाता खुलेका छन । पछिल्लो दुई सातामा डिम्याट खाता खोल्नेको संख्या पनि ४० हजार बढीले बढेको छ ।

यीमध्ये ५ लाख बढी लगानीकर्ताले प्राथमिक बजारमा शेयर भर्ने गरेका छन् । पछिल्लो चरणमा निष्कासन भएको आइपीओमा ५ लाख ८९ हजारसम्म आवेदन परेको पाइएको छ । यसबाट पनि प्राथमिक बजारमा साढे ५ लाख बढी सक्रिय लगानीकर्ता रहेको देखिन्छ । यी मध्येमा दोस्रो बजारमा सक्रिय कारोबार गर्ने लगानीकर्ताको संख्या २ लाख ८७ हजार देखिन्छ ।

कुन ब्रोकरमा कति अनलाइन प्रयोगकर्ता ?

नेप्सेका अनुसार अनलाइन ग्राहक सबैभन्दा बढी ब्रोकर नं ५८ नासा सेक्युरिटीजमा ५ हजार २७६ रहेका छन् । यस्तै दोस्रोमा रहेको ब्रोकर नं ४२ सनी सेक्युरिटीजमा ४ हजार ९८८ अनलाइन प्रयोगकर्ता छन् । ब्रोकर नं ३८ दिपशिखामा ४ हजार ८०५ अनलाइन प्रयोगकर्ता रहेका छन् । ब्रोकर नं ३४ भिजन सेक्युरिटीजमा मात्रै ३ हजार ४५२ अनलाइन ग्राहक रहेका छन्। । हालसम्म ५ ब्रोकरमा ३ हजार बढी अनलाइन ग्राहक छन्। ।

सबैभन्दा कम ब्रोकर नं १८ सगरमाथा सेक्युरिटीजका अनलाइन प्रयोगकर्ता १६८ रहेका छन । २ ब्रोकर कम्पनीमा हालसम्म पनि अनलाइन प्रयोगकर्ताको संख्या ३०० नाघ्न सकेको छैन । ९ ब्रोकर कम्पनीमा अनलाइन प्रयोगकर्ता ५०० भन्दा कम रहेका छन ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।