युनाईटेड इदी–मार्दीको आईपीओ खुल्यो, कसले कति गर्ने आवेदन?

युनाईटेड इदी–मार्दी एण्ड आरबि हाइड्रोपावर लिमिटेड आजदेखि आयोजना प्रभावित स्थानीय बासिन्दाका लागि आईपीओ खुला गरेको छ ।

कम्पनीले कास्कीका आयोजना प्रभावित स्थानीय बासिन्दाहरुकाको लागि एक सय रुपैयाँ अंकित दरमा ४ करोड २० लाख रुपैयाँ बराबरको ४ लाख २० हजार कित्ता आईपीओ बिक्री गर्न लागेको हो। 

कम्पनीले निष्काशन गर्न लागेको आईपीओमा छिटोमा असोज ७ गतेदेखि २१ गतेसम्म आवेदन दिन सकिनेछ । सो अवधिमा सबै शेयर बिक्री नभए ढिलोमा कात्तिक ५ गतेसम्म आवेदन दिन पाइने व्यवस्था छ।

उक्त आईपीओमा स्थानियले न्युनतम १० कित्तादेखि १० हजार कित्तासम्मको लागि आवेदन दिन सक्नेछन्। । कम्पनीको धितोपत्र निष्काशन तथा बिक्री प्रबन्धक ग्लोबल आइएमई क्यापिटल लिमिटेड रहेको छ।

कम्पनीको आईपीओलाई केयर रेटिङ्ग नेपालले ‘केयर एनपी डबल बी प्लस (आइएस)’ रेटिङ्ग प्राप्त दिएको छ। यसले मध्यम सुरक्षित रहेको संकेत गर्दछ।

कम्पनीले दोस्रो चरणमा सर्वसाधारणका लागि ६ लाख ३० हजार कित्ता शेयर निष्काशन गर्नेछ। कम्पनीले स्थानीय र सर्वसाधरणलाई गरेर जारी पूँजीको २५ प्रतिशत अर्थात १० करोड ५० लाख रुपैयाँ बराबरको आईपीओ निष्कासनको अनुमति पाएको छ ।

कम्पनीले २०७६ असोज २० गतेदेखि माथिल्लो मार्दि खोलन जलविद्युत आयोजनाबाट व्यापारिक उत्पादन शुरु गरिसकेको छ ।

आर्थिक वर्ष २०७६/७७ मा कम्पनीको प्रतिशेयर नेटवर्थ ८५.८२ रुपैयाँ रहेको छ। चालु आव अर्थात आव २०७७/७८ मा कम्पनीले प्रतिशेयर नेटवर्थ ९८.६९ रुपैयाँ पुग्ने प्रक्षेपण गरेको छ।  त्यसैगरी, गत आवमा कम्पनीको प्रतिशेयर आम्दानी १२.९७ रुपैयाँ ऋणात्मक रहेको छ भने चालु आवमा ८.३३ रुपैयाँ धनात्मक हुने प्रक्षेपण गरेको छ।

२०७६ असोज २० गतेदेखि माथिल्लो मार्दि खोलन जलविद्युत आयोजनाबाट व्यापारिक उत्पादन शुरु गरेको यस कम्पनीले गत आवको अन्त्यसम्ममा विद्युत बिक्रीबाट १० करोड ५४ लाख रुपैयाँ आम्दानी गरेको थियो।

कम्पनीको प्रति मेगावाट लागत २० करोड ३९ लाख ७६ हजार १४२ रुपैयाँ रहेको छ। कम्पनीको साधारण लगानी फिर्ता हुने अवधि ८.०९ वर्ष रहेको छ भने डिस्काउन्टेड लगानी फिर्ता हुने अवधि १४.९६ वर्ष रहेको छ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।