अदालतको निर्णयविरुद्ध चिकित्सक संघको आक्रोश, आकस्मिकबाहेकका सम्पूर्ण सेवा बन्द

काठमाडौँ ।  उपभोक्ता अदालतले चिकित्सकीय अभ्याससम्बन्धी मुद्दामा गरेको कारबाहीको निर्णयप्रति गम्भीर असहमति जनाउँदै नेपाल चिकित्सक संघले आज देशभरका अस्पताल तथा स्वास्थ्य संस्थामा आकस्मिकबाहेकका सम्पूर्ण सेवा बन्द गरेका छन् ।

पछिल्लो समय उपभोक्ता अदालतले अस्पताल र चिकित्सकमाथि लापरबाहीको क्षतिपूर्तिसहित कारबाहीका निर्णय भएपछि आन्दोलित भएका हुन् ।

सङ्घले देशभरका चिकित्सक तथा स्वास्थ्यकर्मीहरूलाई यही असार १७ गतेदेखि कालोपट्टी बाँधेर सेवा दिन आह्वान गरेकोमा आजदेखि आकस्मिकबाहेकका सेवा ठप्प पारेको हो ।

चिकित्सकहरूलाई सुरक्षित वातावरणमा काम गर्ने अधिकार सुनिश्चित गर्नुपर्नेमा जोड दिँदै सङ्घले यस्तो वातावरण नभएमा स्वास्थ्य सेवामा गम्भीर असर पर्न सक्ने बताएको छ भने सङ्घले नेपाल सरकारले उचित कदम नचाले सशक्त आन्दोलनमा उत्रने चेतावनीसमेत दिएको छ ।