कोरोना बीमा दाबीका लागि बीमितको विवरण नमिल्दा भेरिफिकेशन गर्न समस्या

स्वास्थ्य तथा जनसंख्या मन्त्रालयले कोरोना बीमा दाबी भुक्तानीका लागि पेश भएका बीमितको विवरण नमिल्दा भेरिफिकेशन गर्न समस्या आएको भन्दै सूचना जारी गरेको छ ।

मन्त्रालयले सोमबार एक सूचना जारी गर्दै कोरोना बीमाको दाबी भुक्तानीमा बीमितको विवरण नमिल्दा भेरिफिकेशनमा समस्या आएको जनाएको हो ।

कोरोना बीमा दाबीका लागि पेश भएका विवरणहरु भेरिफिकेशन गर्दा कतिपयको नाम, थर, उमेर, ठेगाना र पिसिआर नतिजा रिपोर्ट मिति जस्ता न्यूनतम विवरण अपुर्ण भएको र कतिपय व्यक्तिहरुको विवरणहरु मन्त्रालयमा रहेको तथ्यांकसँग रुजु गर्दा भेटाउन नसकिएको मन्त्रालयका प्रमुख समिर कुमार अधिकारीले बताए ।

बीमितहरुले भेरिफिकेशनको अवस्थाको जानकारी सम्बन्धित बीमा कम्पनीबाट लिन मन्त्रालयले आग्रह गरेको छ ।

मन्त्रालयले प्रयोगशालाहरुले परीक्षण नतिजा दिँदा वा इपिडिमियोलोजी तथा रोग नियन्त्रण महाशाखामा दैनिक प्रतिवेदन पेश गरेको मिति अनुसार वास्तविक नतिजा प्रदान गर्न परीक्षण ल्याबलाई पनि अनुरोध गरेको छ ।

मन्त्रालयले बीमा समितिबाट जारी भएको कोरोना बीमा मापदण्ड अनुसार समितिबाट प्राप्त भएका बीमितहरुको विवरणहरु भेरिफिकेशन गर्ने कार्य भइरहेको मन्त्रालयले जनाएको छ । हालसम्म ९ हजार ३९२ जनाको भेरिफिकेशन सम्पन्न भएको मन्त्रालयको तथ्यांक छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।