नेपाल रेमिटरर्स एशोसिएसन र मलेशियन एशोसिएसन अफ मनी सर्भिसेसबीच ऐतिहासिक साझेदारी

काठमाडौँ । नेपाल रेमिटरर्स एशोसिएसन (एनआरएनए) ले मलेशियन एशोसिएसन अफ मनी सर्भिसेस बिजनेस (एमएएमएसबी) सँग औपचारिक रूपमा साझेदारी गरेको छ । दुवै संघहरूले मनी सर्भिसेस बिजनेस (एमएसबी) क्षेत्रलाई सुदृढ बनाउन, सहकार्य विस्तार गर्न र वृद्धि प्रोत्साहन गर्न संयुक्त रूपमा काम गर्ने सहमति जनाएको छ ।

यो साझेदारीले ज्ञान आदान–प्रदान, सीमा–पार सहयोग, र अन्तर्राष्ट्रिय उत्तम अभ्यासमार्फत उद्योग मापदण्ड सुधार गर्ने दिशामा केन्द्रित हुनेछ । सम्झौता हस्ताक्षर समारोहका क्रममा, एमएएमएसबीका अध्यक्ष दातो जाजाखान बिन कादेर गनी र एनआरएनका अध्यक्ष रितेश मित्तलले नियामक अनुपालन सुधार, नवप्रवर्तन प्रवद्र्धन, तथा डिजिटल रूपान्तरण, अवैध सञ्चालकहरूको नियन्त्रण, र उपभोक्ता संरक्षण जस्ता साझा चुनौतीहरू समाधान गर्ने विषयमा विचार–विमर्श गरे ।

यस अवसरमा एनआरएनका अध्यक्ष रितेश मित्तलका अनुसार “यो साझेदारी नेपालका रेमिटेन्स उद्योगका लागि ऐतिहासिक उपलब्धि हो । एमएएमएसबीसँगको सहकार्यले क्षेत्रीय सम्बन्ध मजबुत बनाउने, ज्ञान आदान–प्रदान गर्ने, र नवप्रवर्तनलाई प्रोत्साहन गर्नेछ । अन्ततः यसले वैदेशिक रोजगारमा रहेका नेपाली श्रमिकहरू तथा नेपालको समग्र अर्थतन्त्रलाई लाभ पुर्याउनेछ ।”

एमएएमएसबीका अध्यक्ष दातो’ जाजाखान बिन कादेर गनीले भने “हामी नेपाल रेमिटर्स एशोसिएसनसँग सहकार्य गर्न पाउँदा खुशी छौँ । यो साझेदारीले प्रविधि, दक्षता विकास, र अन्तर्राष्ट्रिय मापदण्डको पालना मार्फत मनी सर्भिसेस क्षेत्रलाई सुदृढ बनाउने हाम्रो साझा प्रतिबद्धता झल्काउँछ” ।

यो सहकार्यले दुवै संस्थाबीच सीप विकास, नीतिगत संवाद, र क्षेत्रीय समन्वयका नयाँ द्वारहरू खोल्नेछ । साथै, यसले विश्वभरका लाखौँ वैदेशिक श्रमिक र उनीहरूका परिवारका लागि अझ सुरक्षित, छिटो र किफायती रेमिटेन्स सेवाहरू उपलब्ध गराउने दिशामा महत्वपूर्ण कदम स्थापित गर्नेछ ।