ग्रीन लाईफ हाइड्रोपावरले माघ तेस्रो हप्तादेखि शेयर जारी गर्ने, शेयर रजिष्ट्रारमा सानिमा क्यापिटल

ग्रीन लाईफ हाइड्रोपावर कम्पनीको साधारण शेयर (आईपीओ) २०७७ माघ महिनाको तेस्रो हप्तादेखि सर्वसाधारणको लागी बिक्री खुला हुने भएको छ । ग्रीन लाईफ हाइड्रोपावर लिमिटेड र सानिमा क्यापिटल लिमिटेड बीच शेयर रजिष्ट्रार सम्बन्धी सम्झौतामा सो जानकारी दिइएको हो ।

ग्रीन लाईफ हाइड्रोपावर लिमिटेडले आफ्नो जारी पूँजी १ अर्ब ८० करोडको १० प्रतिशत अर्थात १८ करोड बराबरको १०० रुपैयाँ अंकित दरको १८ लाख कित्ता शेयरहरु तथा स्थानीय बासिन्दाको लागि बिक्री खुल्ला गरेको थियो । स्थानीयमा जारी भएकोमध्ये बिक्री नभएका १६ लाख ९६ हजार ४०० कित्ता शेयर र जारी पूँजीको १० प्रतिशतले हुन आउने १८ लाख कित्ता गरी कुल ३४ लाख ९६ हजार ४०० साधारण शेयर (सामुहिक लगानी कोष, कर्मचारी तथा सर्वसाधारणको लागि निष्काशन गर्न स्वीकृती प्राप्त गरेको छ ।

शेयर रजिष्ट्रार सम्बन्धी सम्झौतापत्रमा सम्झौतापत्रमा ग्रीन लाईफ हाइड्रोपावर लिमिटेडको तर्फबाट अध्यक्ष याङचेन डोमा लामा र सानिमा क्यापिटल लिमिटेडको तर्फबाट प्रमुख कार्यकारी अधिकृत भिष्मराज चालिसेले हस्ताक्षर गरेका छन् । हाइड्रोपावरले २०७७ माघ गतेदेखि लागू हुने गरी सानिमा क्यापिटललाई शेयर रजिष्ट्रारमा नियुक्त गरेको छ ।

कम्पनीको प्रदेश नं. ३, दोलखा जिल्लाको गौरीशंकर गाउँपालिका (तत्कालीन खारे तथा मार्बु गा.वि.स.) मा बहने खानीखोला, हनापु खोला र नाप्के खोलाको पानी मिसाई आयोजना निर्माण गरी ४० मेगावाट क्षमताको विजुली उत्पादन गर्ने उद्देश्य अनुरुप २०७८ वैशाख देखि विद्युतको व्यापारिक उत्पादन प्रारम्भ गर्ने योजना रहेको छ ।

ग्रीन लाईफ हाईड्रोपावर लिमिटेड कम्पनी ऐन, २०६३ बमोजिम मिति २०६६ साल आश्विन ०४ गते नेपाल सरकार उद्योग मन्त्रालय, कम्पनी रजिष्ट्रारको कार्यालयमा ग्रीनलाइफ इनर्जी प्रा.लि.को रुपमा दर्ता भई मिति २०७४ आषाढ ९ गतेदेखि पब्लिक लिमिटेड कम्पनीमा परिणत भएको कम्पनी हो ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।