चाँदीको मूल्यमा नयाँ रेकर्ड, सुनमा सामान्य गिरावट

काठमाडौँ । साताको पहिलो कारोबार दिन आइतबार नेपाली बजारमा चाँदीको मूल्यले नयाँ रेकर्ड बनाएको छ । आज चाँदी तोलामा १०० रुपैयाँले बढेसँगै नयाँ रेकर्ड कायम गरेको हो ।

नेपाल सुनचाँदी व्यवसायी महासंघका अनुसार आइतबार चाँदी प्रतितोला ४ हजार १०५ रुपैयाँ कायम भएको छ । जुन ऐतिहासिक मूल्य हो । शुक्रबार चाँदी प्रतितोला ४ हजार ५ रुपैयाँमा कारोबार भएको थियो ।

आइतबार सुनको मूल्यमा सामान्य गिरावट आएको छ । आज सुन तोलामा १०० रुपैयाँले घटेसँगै प्रतितोला २ लाख ५८ हजार ३०० रुपैयाँ कायम भएको महासंघले जनाएको छ । शुक्रबार सुन प्रतितोला २ लाख ५८ हजार ४०० रुपैयाँमा कारोबार भएको थियो ।

नेपालमा अन्तर्राष्ट्रिय बजारका आधारमा सुनको मूल्य निर्धारण गर्ने गरिएको छ ।

आइतबार अन्तर्राष्ट्रिय बजारमा सुन प्रतिऔंस ४ हजार ३४०.१ अमेरिकी डलर र चाँदी ६७.१४ अमेरिकी डलरमा कारोबार भइरहेको छ ।