तोलामा ४७ सयले महंगियो सुनको भाउ, चाँदीमा पनि बढोत्तरी

काठमाडौँ । साताको पहिलो कारोबार दिन आइतबार नेपाली बजारमा सुनचाँदीको मूल्य बढेको छ । आज सुन तोलामा ४ हजार ७०० रुपैयाँले र चाँदी तोलामा १४५ रुपैयाँले बढेको हो ।

नेपाल सुनचाँदी व्यवसायी महासंघका अनुसार आइतबार सुन प्रतितोला २ लाख ८३ हजार ८०० रुपैेयाँ कायम भएको छ । शुक्रबार सुन प्रतितोला २ लाख ७९ हजार १०० रुपैयाँमा कारोबार भएको थियो ।

त्यसैगरी, आइतबार चाँदी प्रतितोला ४ हजार ३२५ रुपैयाँ कायम भएको महासंघले जनाएको छ । शुक्रबार चाँदी प्रतितोला ४ हजार १८० रुपैयाँमा कारोबार भएको थियो ।

नेपालमा अन्तर्राष्ट्रिय बजारका आधारमा सुनचाँदीको मूल्य निर्धारण गर्ने गरिएको छ ।

आइतबार अन्तर्राष्ट्रिय बजारमा सुन प्रतिऔंस ३ हजार ०७१.९५ अमेरिकी डलर र चाँदी ५८.९२ अमेरिकी डलरमा कारोबार भइरहेको छ ।