७५ लाख लिटर दही खपत

काठमाडौँ । सोमबार मुलुकभर ७५ लाख लिटर दही खपत भएको छ । १५ असार दही चिउरा खाने चलन भएकाले दहीको खपत ह्वात्तै बढेको हो ।

दुग्ध विकास संस्थान (डिडिसी) र निजी डेरीले एक अर्ब रुपैयाँ बराबरको ७५ लाख लिटर दही खपत भएको जनाएका छन् ।

दही चिउरा स्वास्थ्यका लागि लाभदायक मानिन्छ । सबैले दही चिउरा खाएर असार १५ मनाउने भएकाले पनि बजारमा दहीको खपत बढी भएको हो । सोमबार उपत्यकाका अधिकांश डेरी पसलमा दहीको कारोबार करिब तीन गुणाले बढेको छ ।

डिडिसीका सूचना अधिकारी नीलकण्ठ गौतमले मुलुकभर एक करोड ४० लाख रुपियाँ बराबरको एक लाख लिटर दही खपत भएको जानकारी दिए। उपत्यकामा ३० हजार लिटर र बाहिरी जिल्लामा ७० हजार लिटर दही खपत भएको उनले बताए। गर्मी बढेकाले पनि तराईमा दहीको खपत धेरै हुने गर्छ । दही चिउरा खानका लागि घर घरमा दही खरिद गर्ने भएकाले पनि अन्य दिनको तुलनामा कारोबार धेरै हुने गरेको उनको भनाइ छ । पछिल्लो समय डिडिसीको कारोबारमा वृद्धि भएको उनको भनाइ छ ।

नेपाल डेरी एसोसिएसनका अध्यक्ष प्रह्लाद दाहालले दही चिउरा खाने दिन एक अर्ब रुपैयाँ बराबरको दही बिक्री भएको जानकारी दिए । पछिल्लो समय दही चिउरा खाने चलन बढ्दै गएकाले दहीको खपत पनि धेरै हुने गरेको उनको भनाइ छ ।

स्वदेशी दुध तथा दुग्धजन्य पदार्थको प्रयोग बढाउन र नेपाली किसानको उत्पादनलाई प्राथमिकता दिन उनले आग्रह गरे। अध्यक्ष दाहालले नेपाली मौलिक संस्कृति, परम्परा र राष्ट्रिय पहिचानको संरक्षणमा सक्रिय भूमिका निर्वाह गर्न सबैलाई आह्वान गरे ।

दही नेपाली खानपानको महत्वपूर्ण परिकार मात्र नभई पोषणयुक्त खाद्य पदार्थ पनि हो । दहीमा प्रोटिन, क्याल्सियम तथा भिटामिन बी–१२ जस्ता पोषक तत्व पाइने भएकाले यसले पाचन प्रणालीलाई सुदृढ बनाउन र रोग प्रतिरोधात्मक क्षमता वृद्धि गर्न सहयोग पुर्याउने विज्ञको भनाइ छ ।