एलआईसी नेपालको आज हुने साधारण सभाले एक अर्ब बढीको लाभांश पारित गर्ने

लाईफ इन्स्योरेन्स कर्पोरेशन नेपालको आज हुने १७ औं वार्षिक साधारण सभाले ७० प्रतिशत लाभांश वितरण गर्ने प्रस्ताव पारित गर्दैछ ।

कम्पनीको साधारण सभा नेपाल पुलिस क्लबको सभाहल, भृकुटीमण्डपमा बिहान साढे ९ बजे बाट सुरु हुनेछ ।

साधारण सभामा कम्पनीले चुक्ता पूँजीको ३५.५३ प्रतिशतका दरले ५३ करोड १२ लाख रुपैयाँ बराबरको नगद लाभांश र ३४.४६ प्रतिशतका दरले ५१ करोड ५१ लाख रुपैयाँ बराबरको बोनस शेयर गरी कुल ७० प्रतिशतको दरले एक अर्ब ४ करोड रुपैयाँ बराबरको लाभांश वितरण गर्ने प्रस्ताव पारित गर्नेछ ।

एलआइसीले वार्षिक साधारण सभा गर्न साउन ९ देखि २४ गतेसम्म बुक क्लोज गरेको छ । साउन ८ गतेसम्म कायम रहने सेयरधनीले मात्र प्रस्तावित ७०% लाभांश पाउनेछन् । कम्पनीको प्रस्तावित ३४.४६% बोनस सेयरपछि चुक्ता पुँजी २ अर्ब १ करोड रुपैयाँ पुग्नेछ ।

त्यसैगरी कम्पनीले आफ्नो जारी, अधिकृत तथा चुक्ता पूँजी शिर्षकहरुमा रहेको एक अर्ब ४९ करोड ४८ लाख ३८ हजार रुपैयाँलाई वृद्धि गरी २ अर्ब एक करोड रुपैयाँ पुर्याउने र सोही अनुसार आफ्नो प्रबन्धपत्र तथा नियमावलिमा संशोधन गर्ने विशेष प्रस्ताव समेत सभामा लैजादै छ ।

यस्तै कम्पनीमा १ जना स्वतन्त्र सञ्चालक र कम्तीमा एक जना महिला सञ्चालक सहित ६ जना सञ्चालकहरु रहने प्रस्ताव समेत साधारण सभाबाट पारित गर्ने भएको छ ।