नेप्से सूचकमा दबाब कायमै, कारोबार रकम ११ अर्बभन्दा तल झर्यो

धितोपत्र बोर्डले मंगलबार ५१ वटा सूचीकृत कम्पनीहरुको नाम नै सार्वजनिक गरेर अनुसन्धान प्रकृयामा तानेपछि साताको अन्तिम कारोबार दिन बिहीबार पनि शेयर बजारमा त्यसको असर कायम नै देखिएको छ ।

बुधबार ५२ अंक बढीले घटेको नेप्से सूचक बिहीबार भने तीव्र उतार चढावका बीच १.३० अंकले मात्र घटेर २९६८.४२ बिन्दुमा झरेको छ । सेन्सेटिभ परिसूचक पनि ०.५८ अंकले घटेर ५४१.१२ बिन्दुमा झरेको छ ।

कारोबारमा आएका १३ मध्ये ७ समुहको सूचक ओरालो लागेपछि नेप्सेमा दबाब देखिएको हो ।

विकास बैंक, वित्त र अन्य समुहको सूचकमा १ प्रतिशत धेरै बढोत्तरीहुँदा लघुवित्तको सूचक १ प्रतिशतभन्दा धेरैले घटेको छ ।

शेयर बजारको ओरालो यात्राले बिहीबार कारोबारमा समेत सुस्तता छाएको छ । बुधबार १५ अर्ब ४८ करोडको शेयर कारोबार भएको बजारमा बिहीबार कारोबार रकम ४ अर्ब ५८ करोड रुपैयाँले घटेको हो ।

यसदिन कूल २२३ कम्पनीको २ करोड ३ लाख ६५ हजार ६९९ कित्ता शेयर १ लाख २४ हजार ५६१ संख्यामा खरिद बिक्री हुँदा कारोबार रकम १० अर्ब ९० करोड ४९ लाख ५८ हजार ९३५ रुपैयाँ पुगेको छ ।

बिहीबार कारोबार रकमका आधारमा नेपाल पुनर्बीमा कम्पनीको सर्वाधिक शेयर कारोबार भएको छ । कम्पनीको ७६ करोड ७४ लाखको शेयर कारोबार भएको हो ।

यसैगरी नेशनल हाइड्रोपावर २९ करोड, नेपाल इन्स्योरेन्स २७ करोड, निफ्रा २४ करोड, हिमालयन डिष्टिलरी २४ करोड , एनएलजी इन्सयोरेन्स २३ करोड, लुम्बिनी विकास बैंक २२ करोड, अरुण भ्याली २२ करोड, अपि पावर २१करोड र आइएमई जनरल इन्स्योरेन्सको २० करोड बढीको शेयर कारोबारमा आएको छ ।

बिहीबार कुनैपनि कम्पनीको शेयरमूल्यमा सर्किट लागेर बढ्ने वा घट्ने अवस्था देखिएन । बढ्ने र घट्ने दुबै कम्पनीहरुको मूल्य ५ प्रतिशत हाराहारीम घटबढको अवस्था रह्यो ।

आज खानीखोला हाइड्रोपावर, नेपाल फाइनान्स, ग्रीन डेभलपमेन्ट बैंक, कालीका पावर कम्पनी, र सोल्टी होटलको शेयरमूल्य ५ प्रतिशतले बढेको छ । मल्टिपर्पस फाइनान्स, सप्तकोशी डेभलपमेन्ट बैंक, कर्णाली डेभलपमेन्ट बैंक, बेष्ट फाइनान्स र एनएलजी इन्सयोरेन्सको मूल्य साढे ४ प्रतिशत धेरैले बढेको छ ।

उता यसदिनको कारोबारबाट सिईडिबी हाइड्रोपावरको शेयरमा लगानी गरेकाले ६.९६ प्रतिशतले गुमाएका छन् । बिहान सर्किट मूल्यमा बढेको कम्पनीको शेयर अधिक मुल्यवृद्धि पश्चात बिहीबारदेखि घट्न थालेको हो । यसअघि आईपीओ जारी पश्चात कम्पनीको शेयर लगातार ६ कारोबार दिन सर्किट मूल्यमा बढेर सातौं दिनमा आएर घटेको हो । यससँगै बिहान ८०६ रुपैयाँ पुगेको कम्पनीको शेयरमूल्य ६८५ मा झरेर कारोबार बन्द भएको छ ।

यसैगरी गोर्खाज फाइनान्स, माउन्टेन इनर्जीको ३ प्रतिशत धेरै घट्दा हिमालयन पावर पार्टनर, फस्ट माइक्रो, ङादी ग्रुप पावर, ओरियन्टल होटल, स्वरोजगार लघुवित्त, इन्फनिटी लघुवित्त र नेपाल एसबिआई बैंकको शेयरमा लगानी गरेकाले पनि २ प्रतिशतभन्दा धेरैले गुमाएका छन् ।

बजार घटेसँगै लगानीकर्ताको सम्पत्ति मापक कुल बजार पूँजीकरण ४१ खर्ब ३९ अर्ब २८ करोड रुपैयाँमा समेटिएको छ ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।