शेयर बजार सूचक हालसम्मकै उच्च बिन्दुमा

साताको दोस्रो दिन शेयर बजार परिसूचक नेप्सेमा नयाँ रेकर्ड कायम भएको छ। सोमबार शेयर बजार मापक सूचक नेप्सेले यसअघिको रेकर्ड तोडेर हालसम्मकै उच्च बिन्दुमा पुगेको हो ।

आइतबार प्रि ओपनिङ सेसनमा नै २३ अंकले बढेको बजार ३००३.४७ विन्दुमा पुगेको थियो । नियमित कारोबारमा पनि नेप्से उच्च अंकले बढेपछि गत जेठ ३१ गते कायम भएको ३०२५.८३ बिन्दुको रेकर्ड तोडिएको हो ।

सोमबार नियमित कारोबारको ६ मिनेटमा नै नेप्से ५२ अंकसम्म बढेर ३०३२.३० बिन्दु चुमेर फर्किएको थियो । अल्पकालीन लगानीकर्ताले बढेको मौका छोपी शेयर सप्लाई बढाएपछि नेप्सेमा केही दबाब सिर्जना भएको हो । कारोबारको आधा घण्टा अवधिमा नेप्से फेरि ३०२६ बिन्दुमाथि पुगेको छ । यो हालसम्मकै उच्च बिन्दु हो ।

लगानीकर्ताको आक्रमक खरीदले नेप्से पुन बढ्न थालेको छ । आधा घण्टा अवधिमा नेप्से ४७.९२ अंकले बढेर ३०२८ अंकमा पुग्दा २ अर्ब ६५ करोड बढीको शेयर कारोबार भएको छ । २०५ वटा कम्पनीको १ करोड १३ लाख कित्ता शेयर २३ हजार ६८४ पटक खरीद बिक्री भएका हुन् । सोमबार बजार खुलेको ५ मिनेट मै नेप्से ५०.१३ अंकले बढेको थियो ।

चालु आवको पहिलो दिन पनि नेप्से ९७ अंकले बढेको थियो । नयाँ प्रधानमन्त्री शेयर बहादुर देउवालाई विश्वासको मत दिने अन्य गठबन्धन दलहरुको घोषणाले चालु आवको पहिलो दिन नै नेप्सेले सर्वाधिक उचाई चुमेको थियो । सोमबार पनि उक्त बढोत्तरीले निरन्तरता पाएको छ । 

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।