नयाँ रेकर्ड बनाएको नेप्सेमा पाँचौं कारोबार दिनमा दोहोरो अंकको गिरावट, विकास बैंकमा आकर्षण

एकपछि अर्को गर्दै सूचकमा नयाँ नयाँ रेकर्ड दर्ज गरेको नेप्से सूचकमा साताको अन्तिम कारोबार दिनमा आएर दोहोरो अंकको करेक्शन आएको छ ।

बिहीबार १६ अंकले घटेर ३१०७ दशमलव ४५ बिन्दुमा झरेको छ । यसअघिका चार कारोबार दिनमा नेप्से ४३.३७ अंकले बढेको थियो । बुधबार सूचक ३१२३.१५ पुगी नयाँ रेकर्ड कायम गरेको थियो ।

बिहीबार २२६ वटा कम्पनीको २ करोड ८८ लाख ४५ हजार ४३१ कित्ता शेयर१४ अर्ब ३१ करोड ६२ लाख ४९ हजार ९६५ रूपैयाँ बराबरमा खरिद बिक्री भएका छन् । यसदिन १ लाख ३५ हजार ४२ वटा संख्यामा कारोबार भएको नेप्सेले जनाएको छ ।

बिहीबार कारोबार भएका १३ मध्ये विकास बैंकको सूचक २ प्रतिशतभन्दा धेरै बढेको छ भने बैंक सामान्य बढेको छ । बाँकी ११ वटा घटेको छ । जलविद्युत, ब्यापार होटल, उत्पादन र लगानी सूचक १ प्रतिशतभन्दा धेरैले घटेका छन् ।

बिहीबार अपर तामाकोशीको सर्वाधिक ६४ करोड ६५ लाख रुपैयाँ बराबरको शेयर कारोबार भएको छ । नेपाल विद्यूत प्राधिकरणको कार्यकारी निर्देशकमा कुलमान घिसिङ्ग ल्याउने खबरले बुधबार सर्किट लागेर बढेको कम्पनीको शेयर पनि सर्किट लेबलमा बढेर उच्च बिक्री चापका कारण बुधबारभन्दा घटेर बन्द भएको छ ।

यसैगरी अपि पावर, अरुण भ्याली, अरुण काबेली फस्ट माइक्रोफाइनान्स, ज्योति विकास बैंक, सानिमा माई हाइड्रोपावर, युनिभर्सल पावर, बुटवल पावर र युनाइटेड मोदी हाइड्रोपावरको शीर्ष दश ठूलो कारोबार भएको छ । दशौं ठूलो कारोबार भएको युनाइटेड मोदीको २२ करोड बढीको शेयर खरीद बिक्री भएको छ ।

आज नेपाल फाइनान्स कम्पनी, जीवन विकास लघुवित्त, कर्णाली डेभलपमेन्ट बैंक र युनियन लाइफ इन्स्योरेन्सको शेयरमूल्यमा सकारात्मक सर्किट लागेको छ । जानकी फाइनान्स र खानीखोला हाइड्रोपावरको मूल्य ५ प्रतिशत धेरैले बढ्दा सप्तकोशी डेभलपमेन्ट बैंक, मितेरी डेभलपमेन्ट बैंक, बुटवल पावर र आइएमई जनरल इन्स्योरेन्सको शेयरमूल्य ३ प्रतिशतभन्दा बढीले बढेका छन् ।

यसदिन अधिकांश हाइड्रोपावर कम्पनीको शेयरमूल्य घटेको छ । बुधबार उच्च बढेको ती कम्पनीमा बिहीबार करेक्शन आएको हो । युनिभर्सल पावर, हिमालयन पावर पार्टनर, शिवश्री हाइड्रोपावर, ग्रीन लाइफ हाइड्रोपावर, युनाइटेड मोदी हाइड्रोपावर, र बरुण हाइड्रोपावरको मूल्य ५ प्रतिशतभन्दा धेरैले घटेको छ । लिवर्टी इनर्जी, हिमाल दोलखा हाइड्रोपावर, साञ्जेन, घलेम्दी हाइड्रोपावरको मूल्य करिब पाँच प्रतिशतका दरले नै घटेका छन् ।

नेपाल राष्ट्र बैंकले मौद्रिक नीति सार्वजनिक गर्न ढिलाइ गर्ने संकेत र बिना आधार एकाएक बुधबार जलविद्युतमा आएको उछालमा बिहीबार करेक्शन आएको हो । चुक्ता पूँजी कम भएका विकास बैंकको शेयरमा कारोबारी लगानीकर्ता प्रवेश गरेको देखिन्छ । पछिल्लो समय दैनिक एउटा समुहबाट नाफा सुरक्षित गरी अर्को समुहमा प्रवेश गर्ने ट्रेण्ड देखिएको छ । कारोबारी लगानीकर्ताको छिटो छिटो क्षेत्र परिवर्तले नयाँ लगानीकर्ताको लगानी भने थप जोखिमपूर्ण बनेको छ ।

नेपाल स्टक एक्सचेञ्जको ट्रेड म्यानेजमेन्ट सिस्टम, नेप्सेको पुरानो वेवसाइट र नयाँ वेवसाइटमा फरक फरक अंकमा बिहीबार नेप्से घटेपछि लगानीकर्तालाई कुन चाँही आधिकारिक हो भन्ने अन्यौलता उत्पन्न भएको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।