सहारा विकास बैंकले तीन आर्थिक वर्षको एकैपटक डाक्यो साधारण सभा, गरिमासँग विलय हुँदै

सहारा विकास बैंक (SHBL) ले रोकिएको तीन आर्थिक वर्षको साधारण सभा आगामी भदौ १२ गते शनिबार एकैपटक डाकेको छ ।

बैंकले आर्थिक वर्षहरु २०७४/७५, २०७५/७६, र २०७६/७७ गरी तीन आर्थिक वर्षको साधारण सभा सलार्ही मलंगवामा रहेको कुसुम एण्ड पार्टी प्यालेसमा बोलाएको हो ।

बैंकले साधारण सभामा गरिमा विकास बैंकमा १ बराबर १ अनुपात शेयर स्वाप रेसियोमा प्राप्ति हुने विशेष प्रस्ताव राखेको छ । यसअघि विसं २०७४ जेठमा हाल कुमारी बैंकमा विलय भएको साविकको देवः विकास बैंकसँगको मर्जर सम्झौता गरे भाँडिएपछि विलय प्रकृया नै अलपत्र परेको थियो ।

राष्ट्र बैंकले फोर्स मर्जर प्राप्तीमा जान निर्देशन दिएपछि बैंक गरिमासँग विलय हुन लागेको हो । मर्जरका कारण बैंकको शेयर कारोबार सोही बेलादेखि नै नेप्सेमा रोक्का रहेको छ । तीन वर्षयता बैंकको शेयरमा लगानी गरेका लगानीकर्ताको सम्पत्ति मर्जरका कारण नै बन्धक बनेको छ । अब गरिमासँगको एकीकृत कारोबार पछि मात्र बैंकको शेयर कारोबार खुल्नेछ ।

बैंकको शेयर कारोबार विसं २०७४ जेठ २५ गतेपछि रोक्का रहेकाले सो मितिसम्म कायम शेयरधनीले साधारण सभामा सहभागिता जनाउन सक्नेछन् ।

बैंकको संस्थापक र साधारण दुबैतर्फका शेयरधनीले सो मितिपश्चात वितरित बोनस पछि कायम हुने शेयर संख्या अनुसार नै गरिमा विकास बैंकको शेयर पाउनेछन् ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।