निफ्राको खुद नाफा ४४ करोड माथि, अन्य सबै सूचक सकारात्मक

नेपाल इन्फ्रास्ट्रक्चर बैंक लिमिटेड (निफ्रा) ले चालु आर्थिक वर्ष २०७८।७९ को दोस्रो त्रैमाससम्ममा ४४ करोड २६ लाख ४८ हजार रुपैयाँ खुद नाफा कमाएको छ ।

गत आवको सोही अवधिमा ३५ करोड २२ लाख ५५ हजार रूपैयाँ खुद नाफा आर्जन गर्न सफल भएको बैंकले समीक्षा अवधिमा २५.६६ प्रतिशतले नाफा वृद्धि गरेको हो । यस अवधिसम्म बैंकको वितरणयोग्य मुनाफा ३४ करोड ८६ लाख ४४ हजार रुपैयाँ रहेको छ ।

चुक्ता पूँजी २० अर्ब रुपैयाँ रहेको बैंकको वार्षिक प्रतिसेयर आम्दानी ४.२३ रुपैयाँ छ । गत आर्थिक वर्षको पुस मसान्तसम्ममा बैंकको इपिएस ५.८७ रुपैयाँ थियो । यस्तै जगेडा कोष ७.५९ प्रतिशतले बढेर २ अर्ब ८४ करोड ४४ लाख ६ हजार रुपैयाँ सञ्चित रहँदा प्रतिसेयर नेटवर्थ ११४.२२ रुपैयाँ कायम छ । बैंकको र मूल्य आम्दानी अनुपात (पीई रेसियो) ८८.७६ गुणा, कस्ट अफ फण्ड ९.४० प्रतिशत, खराब कर्जा अनुपात शुन्य र सिडी रेसियो ३५.१४ प्रतिशत रहेको छ ।

समिक्षा अवधिसम्म बैंकले पुस मसान्तसम्ममा १ अर्ब ११ करोड ७७ लाख रुपैयाँ निक्षेप संकलन गरेर ८ अर्ब १३ करोड ६४ लाख रुपैयाँ कर्जा परिचालन गरेको छ । बैंकको खुद ब्याज आम्दानी ४४.६१ प्रतिशतले बढेर ८२ करोड ३५ लाख ५६ हजार रूपैयाँ पुगेको छ । गत वर्षको यसै अवधिमा बैंकको खुद व्याज आम्दानी ५६ करोड ९४ लाख ८५ हजार रूपैयाँ रहेको थियो ।

दोस्रो त्रैमाससम्म आइपुग्दा बैंकको सञ्चालन मुनाफा २५.५७ प्रतिशतले बढेर ६३ करोड २३ लाख २१ हजार रूपैयाँ पुगेको छ । गत वर्ष बैंकले ५० करोड ३५ लाख ७६ हजार रूपैयाँ सञ्चालन मुनाफा गरेको थियो ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।